【中環在線】喺香港搞生物科技嘅公司唔少，其中被稱為賭王何鴻燊身邊得力助手之一禤永明嘅囝囝禤駿遠（Ian）創立嘅知臨集團（Aptorum），前排成功喺美國納斯達克上市。Ian就同記者話生物科技喺美國好普及，香港潛力其實好大，尤其係傳染病研究嘅能力，仲話條件許可，會計劃喺香港上市。
講到Ian爸爸禤永明，佢喺銀行業界打滾多年，1979年加入信德集團，曾經幫過賭王嘅澳娛收購誠興銀行。華華問到Ian同何鴻燊醫療拓展基金會嘅關係，佢只係輕輕帶過話係委員之一，自己只係以個人身份出席，公司亦無參與。講到Ian同賭王關係，佢只係答：「我父親同佢做嘢。」賭王亦無入股公司。
不過Ian好叻仔，名牌大學普林斯頓大學讀商科出身，曾經做過醫藥業分析員，之後創立知臨呢間製藥公司，現時仲有10項在研藥物，當中進程最快嘅係由港大醫學院研發嘅對抗金黃葡萄球菌嘅非抗生素藥物，華華希望佢間公司成功啦。
李華華
mailto:[email protected]