法甲班霸巴黎聖日耳門（PSG）又輸一仗！星期二法甲PSG喺兩度領先之下，竟然以2:3輸咗畀蒙彼利埃，近5場比賽先贏得1場，害死唔少上盤客。不過教練杜曹賽後仍然死撐PSG踢得唔差，只係球員個人失誤較多；法媒仲話呢位將PSG由去年三冠王，變成單冠球隊嘅主帥，好大機會續約加人工。
PSG今場作客蒙彼利埃依然強陣出擊，其中早前喺法足盃打球迷嘅尼馬、迪馬利亞同馬昆奴斯哥利亞全部正選，仲有門神保方把守最後一關。踢咗12分鐘，PSG就收到份大禮，蒙軍後衞奧約高擺烏龍幫PSG領先；點知去到21分鐘，PSG後衞派斯奴甘佩比就禮尚往來，門前將個波撞入自己個網，結果兩隊互擺烏龍下，半場踢成1:1。
傳杜曹續約兼加人工
換邊後PSG靠迪馬利亞建功再次領先。不過去到80分鐘，PSG竟然畀蒙軍射手安迪迪洛特單刀破網；五分鐘之後，冬窗以4,700萬歐元（約4.1億港元）加盟嘅里安度柏利迪斯，竟然俾蘇利文尼卡馬拉偷到個波，仲射穿埋保方嘅十指關！結果PSG就喺兩度領先之下，再次爆冷以2:3畀對手反勝。
PSG近5場有4場輸盤
賽後領隊杜曹仲死撐：「我哋其實踢得唔差㗎！只喺球隊犯咗太多個人錯誤，呢個先喺輸波原因。好多球隊季尾都會放鬆，呢種事我明白但我唔想接受囉！」雖然杜曹嘅領軍成績，比起上季嘅艾馬利仲衰，歐聯一樣16強出局，本土盃賽仲要輸咗兩個，由三冠王變聯賽單冠，但法媒最新消息話，PSG高層竟然決定同杜曹續約至2021年夏天，仲願意為佢加薪50%，由原先嘅500萬歐元年薪加到750萬歐元，所以就算有傳杜曹俾車路士同拜仁慕尼黑挖角，佢都決心留喺PSG喇！
不過一眾以真金白銀追開PSG嘅上盤客，就真係多得杜曹唔少喇，事關季初成日5、6球大勝對手嘅PSG，近5場有4場輸盤（見附表），唯一贏嘅都只係收半個盤，嚟緊PSG仲有四場法甲，各位睇路啊！