37歲嘅前皇家馬德里門將卡斯拿斯（圖），星期三跟隨現時效力球會波圖操練時心臟病發，即刻被送往當地醫院治理，波圖之後發出聲明，話呢位曾幫西班牙國家隊贏得1屆世盃同2屆歐國盃嘅門將情況穩定。波圖向葡萄牙媒體TVI證實聖卡斯心臟病發送院嘅消息，但指呢位門將情況穩定，進展唔錯，但預計會進行更詳細嘅檢查，今季剩低嘅賽事唔會再披甲。