【黑鏡線索】
前排尹思哲介紹咗位創辦人，佢公司整嘅app叫Sorted，年年都拎Apple嘅獎，所以有番咁上下嘅用戶。最特別嘅係，呢位創辦人，一早就立定心志，帶埋一家大細，離開香港，周遊列國咁生活，所以佢營運公司嘅方法，係圍繞住呢個目標去設計，包括共同創辦人，都係搵個理念一致嘅。佢話一切已經準備就緒，暑假開始就會出發。
另一個案，聽同事講，原來係一個舊同事，後生仔，畢業幾年，近排移居去咗清邁，而原來清邁近年好受後生仔歡迎。傳統移民勝地英美澳加唔容易移，清邁台北等等，物價相對平，舊同事遙距接programmer嘅工作，收返香港價，甚至美國價，喺清邁誇張啲講句，可以live like a king。
加速趕走IT人
另一個案，係好友嘅加密幣公司，加入咗台灣嘅Appswork，係當地最出名嘅私營incubation program。以朋友嘅技術同經濟實力，同埋產品嘅成熟程度，其實唔需要入incubation，大家問佢點解選擇加入，其中一個原因，係入咗個program，好容易攞到visa，喺當地開咗公司之後，又唔難逐步逐步順手攞埋居留權，即係順便為移民鋪埋路。
IT呢一行，可能係最mobile嘅行業。一來，IT技術，冇乜分地域可言。你喺香港識寫program，等於你喺清邁都識寫program。第二，programming唔使攞牌，唔同醫生，所以清邁冇得唔畀你喺佢度寫program。
第三，programming容易遙距做，你住清邁唔等於只可以做清邁客，所以攞發達地區收入，但只係非發達地區嘅支出。第四，全地球唔夠programmer，遙距都大把公司肯請，而移民又容易攞高分，當係渴市嘅技術人口。
未「送中」，呢行都已經唔少人走咗或走緊。送埋中，就係再踩多一腳。送中趕人，趕得最快嘅，係最mobile行業嘅人。既然IT行嘅mobility係數一數二，即係話，送中等等政策，衝擊最大嘅行業，就肯定包括IT。
埋葬創科最後一口釘
政府一向鍾意懶係重視IT，話要從細路着手，又STEM又剩去培育更多人才，又搞個創科局，點樣點樣資助科網創業，懶係多動作。呢啲動作，行內好多人都唔會期待靠政府會做得出任何成果，佢鍾意吹咪吹，最多諗吓點樣尋租。
但搞一個送中，就算STEM呀資助呀有任何嘅效果，都一下子抵銷晒有餘。膠吹一回事，落井下石卻係另一回事。經此一役，政府喺發展IT呢一環係徹底誠信破產。趕走人才，乜嘢硬件，科學園數碼港河套等等，都係廢嘅，好大機會，送中將會係埋葬香港創科嘅最後一口釘。
撰文：宋漢生