自由黨榮譽主席田北俊（圖）嘅fb不嬲都有捧場客，隨便同條魚合照都有過千個like，平安夜同太太搭吓地鐵又2,000個like。但係今朝佢個post就犀利喇，冇新相，只係幾條簡單嘅問題啲like就破3,000。大家估吓田少講乜？ 原來又發功講送中條例。
當年23條立法令50萬人上街，田少領導嘅自由黨因民意反對決定唔支持立法，到今日依然獲好多人讚賞，日前民陣發起反送中遊行有13萬人參與，署理特首張建宗話人數唔係重點。田少就喺fb話「人數真的不重要？咁乜嘢先重要？」佢仲話「遊行已經過咗兩日，政府真係當13萬人無到㗎喎﹗」
佢亦提到2003年反23條遊行嘅50萬人感動咗佢，「唔知今次要咩數字，先可以輕輕觸動政府？」
其實田少都有po相，不過張相唔係重點，寫喺張相上嘅嘢先係。佢話回歸嗰陣中港冇移交逃犯安排係用嚟「保障港人、一國兩制和高度自治，成為香港獲世貿或美國特別貿易優惠的理據，並非政府所言的漏洞」。 其實田少都應該明，今日嘅佢或者同2003年嗰陣冇乜分別，但其他保皇黨同埋特區政府已經唔同當年，又正如佢喺fb上留言：「香港人仲可以點？」