428後，一直講迫在眉睫的林鄭市長，黑埋口臉，向被感召的上帝發炮：「擺明13萬，不，2.28萬人欺凌，你點解唔撐我，係咪受到佔中九子煽惑又煽惑再煽惑？你到底係咪真上帝，抑或，係鬼！」
湯渣作狀將My Way擺上枱：「各位都知我個花名係十一，你明啦。我前面條路係one way兼倔頭嘅，一路向西，返唔到轉頭，但起碼有兩萬人因我這種政治垃圾行出來！耶穌，俾次機會，免我全家落地獄行嗎？」
掃把頭見機不可失串宿敵：「市民想重演當年五十萬人上街反23條，Carrie妹妹，你冇咁弱雞跪低係嘛，咁點做市長？阿爺睇漏眼，原來你係假扮好打得。學吓我，麒麟撞飛都冇有怕。如果你驚，等我做你個位，一次過，送中兼23條，雙辣上馬，我玩晒啦！係又點，怕你民建聯個賤嘴男咩？車公保佑我！」
重口味豬姐講大話不腰疼：「台灣嚴禁大陸豬入境，變相將瘟豬留喺香港，香港淪為瘟豬天堂，個漏洞大過條豬腸。講完。肛門！」（豬唇漏風，阿門變肛門。）