江旻憓出外比賽時，習慣在機場買本人物傳記隨行，出發古巴剛好讀着米歇爾自傳；往多哈大獎賽時，她又帶了舒拉寶娃的書，「點知第一輪就輸咗，我唔係好想再望到佢。」她心底渴慕霸氣四溢、穩如泰山的強人，偏偏她如雲上仙女般盈盈儍笑魂遊太虛，總把「我好肉酸」掛在口邊，自言「行路都成日跌低」，典型的強人形象似乎與她怎也沾不上邊。那又如何？她克服重傷，熬過孤單，以純克剛，走出一條重劍一姐路。
記者：洪量丰
攝影：謝榮耀
今年三月，25歲的江旻憓挾兩站世界盃冠軍出戰布達佩斯大獎賽，結果32強爆冷出局，不過競爭對手積分逾期，江旻憓敗陣而回卻升上重劍世界第一。平日運動員出外作賽披金戴銀，凱旋時傳媒蜂擁往機場迎接；江旻憓無冕回港，但一姐如「當紅炸子雞」，出關一刻各大傳媒記者一字排開，快門聲此起彼落，江旻憓手上空無一物，難堪嘆道「對唔住呀我冇嘢畀你哋影」，說着說着淚水奪眶而出，她尷尬得立時蹲下擦淚，站起來梨花帶雨搖頭連說不配，「我心目中嘅世界第一一定唔係好似我咁樣」。旁人讚道一姐登基，焉懂天涯路上風雨拍臉，獨上高樓，高處卻未算高，鏡頭前是榮是辱，到頭來也是江旻憓一人面對，但，她也早習慣了。
江旻憓像個與世無爭的仙女，她率真、愛笑、吃素、賞花、睡前習慣讀星雲大師寫的小故事。父母只得她這獨生女，萬千寵愛集一身，小時候她在雲深不知處自得其樂，也不甘孤獨，「我好羨慕人哋有兄弟姊妹，我都好想有哥哥姐姐。」西方社會談獨生兒童，多伴隨古怪孤僻的刻板印象，江旻憓赴美讀大學時，同學戲言「原來你係only child？咁唔怪得之啦。」她頓一頓，露起大板牙笑說：「諗番起細個都係有啲奇怪，會自己同自己捉棋，『嗯，今日我想邊個我贏呢？』」
獨鍾情劍擊 望貢獻社會
仙女深閨天宮，百無聊賴，以單純雙眸窺探人間百態，參加課外活動正是下凡好機會，「我成日喺屋企好無聊，所以佢哋（父母）當畀我出去玩啲嘢。」最初母親送她學芭蕾舞，「嘩！我好唔鍾意，我好唔習慣要照鏡。」江旻憓皺起眉頭，架起雙手比劃着，舞者翩翩伸手在她如「Dab」舞姿，「我就咁樣、咁樣，好差呀，其實我覺得自己除咗劍擊，玩其他運動都好唔協調。」舞蹈室旁有跆拳道班，江旻憓千方百計避開芭蕾舞，跆拳道恰好成避風港，「我鍾意踢嘅聲，但係我唔鍾意打人，最後我攞咗兒童黑帶（品段）之後就冇得再升喇。」父母喚她「憓憓」，憓者順從，母親堅持她要學習形態「優雅」的活動，畫畫、鋼琴、古箏、溜冰，她循規蹈矩乖乖聽命，「佢哋好錫我，由細到大我都唔想佢哋失望，我好乖，可能因為自己一個。」後來她與母親重談兒時軼事，才知當時母親見千依百順的女兒對芭蕾舞等避之不及，心底失望不已，無奈要裝作支持。江父取其中庸，提議江旻憓學習劍擊，「佢話呢個係格鬥中嘅芭蕾舞。」那時正好港隊挑選明日之星，江旻憓順利進入體院習劍，她先天手長敏捷、後天辛勤努力，一路拾級而上，成長間盡攬全國少年賽、亞青、亞少冠軍。
18歲時她憑優秀學業成績考入美國史丹福大學主修國際關係，隻身離家住入彼邦的宿舍，孤獨應對異鄉的陌生，「頭三個月再辛苦啲，因為未試過離開屋企自己一個。」陌生再可怕也能適應，偏是大學劍隊沒有重劍教練。無師，江旻憓堅持獨自苦練自通，啟蒙教練陳勁持憶述那時偶爾會越洋電話指導，「我都係劍手但我自愧不如，佢去到史丹福大學時學校得佩劍同花劍教練，我試過同佢打電話教劍，但佢真係好努力，讀書好忙，日日瞓幾個鐘就去練劍。」在美求學那幾年間江旻憓缺乏系統訓練，但她仍摘下世界盃和亞運銅牌，世錦賽更歷史性殺入八強。當時2016年里約奧運將至，在美斷斷續續練習終究不是辦法，她決定停學一年全心備戰。坊間人人憧憬興趣轉化職業，江旻憓回望那段生活只餘下劍擊的日子倒心有餘悸，「我覺得好大壓力， 成日都練到唔知想點咁，要淨係睇成績先知我返工返得好唔好，又唔係好似話做咗功課完咗就完，所有嘢都係諗緊劍呀劍呀劍。」
受傷被勸退 媽媽急抱孫
初戰奧運她於16強謝幕，創香港劍手歷來最佳成績，巴西璀璨過後她重返校園，盤算日後還是邊練習邊工作，「畢業時我都想試吓做嘢，過大人嘅生活，因為由細到大都係打劍同讀書 。」看似不食人間煙火的她願望關心弱勢，貢獻社會，「我之前覺得打劍好似好自私，對我嚟講係好有意義，不過對身邊人冇咩影響，但社會企業真係幫到好多人。」回港初時她上午到社企實習，安排學生替基層小孩補習，下午再回體院訓練。17年她出戰亞錦賽掃走1銀1銅，世界排名也升上第五，以為雙線發展事事順利，同年六月她狀態大勇往德國準備世錦賽，「媽咪送我去機場時仲好興奮好開心」，豈料熱身時重創左膝，遭遇運動員最忌的十字韌帶斷裂，兩母女幾天後又在機場見面，「佢喊住咁車我返屋企」。人在景在事不再，一切計劃歸於虛空，「當時好恐怖，有啲朋友又話咩會長短腳，永遠都唔會係原裝。」江旻憓的笑容總讓人低估其堅毅，當時醫生預計手術後九個月她才能復出，結果她術後四天按捺不住開始操練上肢，三個月後正式復操，11月她已置身蘇州出戰世界盃，教人嘖嘖稱奇。
在蘇州時，江旻憓回到熟悉的劍道，心情起伏不定，「我未打已經喊緊，連對手都行埋嚟問『Are you ok?』我唔知自己做乜，好想打但又好驚整親。」自江旻憓成年，父母甚少隨隊出外觀賽；但復歸賽場的一整年間，為人母的必定陪伴，江旻憓泣於劍道，母親在場邊也是淚潸潸，「媽咪仲擔心過我，佢一諗起我受傷都會喊。」傷患陰霾如煙過去，僅在江旻憓膝上留下輕吻，卻烙在母親心中，江旻憓說她受傷時母親連連奉勸「唔好打劍喇，行得番就算啦」！即使康復，她見江旻憓日夜練習又怕她辛苦，江旻憓沒好氣笑言，「我叫佢唔好成日拖我後腿，我去練習，佢就成日叫我唔好去，佢想我休息養生。」
愛笑又愛哭 自覺贏運氣
母親憂其健康，更牽心未來。讀幼稚園時，老師問同學志願，答案不離醫生警察消防員，獨江旻憓答「我想做媽媽」。老師驚奇，向江母讚揚她樹立榜樣。長大後江旻憓初心依然，「我𠵱家都想做媽咪，因為我好鍾意小朋友，我有個好好嘅媽咪，所以我都好想好似佢咁。」然而十劃未有一撇，母親念念不忘心急如焚，「我媽咪好擔心，佢成日都問『哎呀，我幾時可以抱孫呀！』，但又未有着落。」農曆新年姨媽姑姐問長問短，江旻憓近年過節都出外比賽，得以避過「背景審查」，「我冇擔心，我𠵱家有劍擊。」江旻憓閉上兩眼，又道：「係呀，佢搞到我都有少少擔心，但唔緊要，我唔諗住先啦。」
單身未有伴，網民雙眼發光，他們眼中的江旻憓「又pure又true」，連傳媒也頻以「微笑公主、重劍女神」稱之，但這位「公主」自小怕照鏡子、有自己聲音的錄音也不願重聽，看見樣子印在宣傳品上耍手擰頭呼「肉酸」，「 我覺得唔好意思呀好尷尬，𠵱家算進步咗，以前啲相真係唔睇。」江旻憓成長於英語學習環境，但她熱愛中國文化，求學時一直有補習中文，也刻意以全廣東話受訪，不似「偽ABC」般中英夾雜。不過現今世代似乎鮮有年青人慣說「肉酸」，「咁會用咩字？」她好奇問，「樣衰、核突、醜樣咁囉。」聽罷她莞爾一笑，「我識呀，全部都係用嚟形容我嘅。」沒想到她有如此反應，我一時語塞，只好儍笑找新話題。
江旻憓愛笑，她慶幸劍擊要戴上頭盔，不用裝出殺氣騰騰的樣子，「我已經笑少咗，以前笑得仲多，我通常係諗起教練或者令人失望時最唔開心。」比較其他頂級劍手時，身高1米78的江旻憓身段放得很謙卑，「佢哋好有冠軍相，一出到嚟對自己有信心，想贏嘅心好強。」甚少聽見江旻憓讚賞自己，即使登上女子重劍之巔，她仍猛說不配，談起古巴封后歷程，她只道運氣使然，「古巴贏好似好好彩，點樣打都有，我冇諗住拮佢，佢自己撞埋我把劍。」
或許她並非缺乏自信，而是永不滿足現狀，也敢於在人前坦白不足。江旻憓確實誠實得有趣，從布達佩斯回港時她在鏡頭前淚滴如珠，一臉沮喪的原委竟是惹怒了教練Tavi，「我最唔開心教練真係好嬲，佢話排名係nothing！你都唔識打劍！我想教練鍾意番我。」
一個月後的傑出運動員選舉頒獎禮上，江旻憓穿上一襲墨綠色的旗袍到場，碰巧佈景版又以綠色為主，她每見記者都笑呵呵地重複同一句話：「睇吓，我同個背景融為一體！」明明才剛於世界盃成都站首圈出局，心情卻與上次機場受訪時大相徑庭，有記者直問她與教練關係，她開懷暢說，「我終於同佢和好咗喇，我好嬲佢搞到我喊咗咁耐，我唔知原來電視有直播，好失禮呀，我冇睇晒都想像到有幾差！」
江旻憓談得興起會踮起腳晃動，提及尷尬事時而裝鬼臉、時而反起白眼伸手抹臉裝拭汗。她說兒時悶極會跟自己下棋，我想起金庸筆下習得左右互搏者中，周伯通童心不泯、郭靖質樸至純、小龍女脫俗空明，眼前的她不似場上虎虎生威劍劍入肉的一姐，倒像個在咖啡店跟友人訴心事的爽直少女。