因「佔中案」被判刑嘅立法會議員邵家臻，因為有病𠵱家仲喺伊利沙伯醫院羈留病房留醫，噚日律師文浩正同立會議員張超雄有去探佢。張超雄話邵家臻身體狀況叫OK，但見到佢就瘦咗啲，仲話之前邵家臻比較辛苦，不時又屙又嘔，好彩𠵱家停咗，不過喺羈留病房嘅邵家臻就覺得幾悶，因為入面冇電視，每日又只可以睇一份報紙，除非有朋友探佢，否則係完全唔知社會外面發生咗乜嘢事。
陳淑莊不適取消探病
對於啱啱過去嘅星期日有13萬人上街反「送中」條例，張超雄話邵家臻對咁多人上街感到好欣慰，又知道市民好支持佢，對佢係一支好重要嘅強心針，張超雄仲話邵家臻正寫緊文章回應4.28大遊行，又同懲教署申請出席立法會會議同福利事務委員會，希望每個月至少有一次機會開會，喺呢段時間佢會盡量同辦事處嘅人保持溝通，喺議會度透過書面提出質詢同提問。
張超雄又透露，噚日原本計劃同九子之一嘅陳淑莊去醫院探邵家臻，但Tanya突然身體不適，所以冇去到，Tanya想喺自己做腦手術前，點都探邵家臻一次。