反送中條例4.28遊行當日，新民黨議員容海恩老公袁彌昌喺facebook上載咗一張萬人空巷嘅遊行相片，再加上一句「Hong Kong has reawakened（香港再覺醒）」，引起好多人議論紛紛。唔知袁彌昌係咪為咗補鑊，日前佢再喺fb發帖講「何謂覺醒」，貼咗日本動漫《聖鬥士星矢》入面，被稱為「最接近神的男人」嘅黃金聖鬥士處女座沙加嘅圖，沙加亦係最早覺醒第八感「阿賴耶識」嘅聖鬥士，袁彌昌明顯想拎聖鬥士嚟轉移視線，但解釋咪即係掩飾！
葉劉：覺醒即係BB瞓醒
咁佢老婆容海恩又點睇？容海恩噚日喺休會期間抱咗佢個BB現身會議廳，好多人圍住影相之餘，八方同記者都追問佢老公句「香港再覺醒」係乜意思？容海恩即時扁嘴擰頭，但一句都唔講；而撮合佢哋嘅「紅娘」葉劉淑儀就有個「神級」解讀：「佢（袁）嗰日話覺醒呢，即係話BB女瞓覺醒咗！」聽到葉劉咁都講得出？傳媒除咗大笑兼「哦」一聲外，真係唔知仲有乜好講。
講開BB，有人問容海恩個BB有冇攞訪客證？容海恩話：「冇喎，（BB）冇身份證，我抱住入嚟嘛！」令人相信容BB係極少數無證但又可進入立法會會議廳嘅「特權」人士。
李八方