中國國家隊自從喺中國盃兩戰全敗之後，簡拿華路就話唔撈，淨係專心教廣州恒大喇，下任國足教頭誰屬，相信呢個絕對係13億人頭號關注嘅大事，不過似乎一切已經有定論，因為71歲嘅「銀狐」納比強勢回歸，據內地傳媒講，納比會簽約四年，帶隊出戰下屆世盃同亞洲盃！
曾批國足冇盡力
曾經帶領過意大利喺2006年世盃封王嘅納比雖然經驗老到，據報年薪仲有成2,000萬歐元，但連佢都唔係幾教得掂國足，事關喺佢治下國足一直都冇乜起色，今年亞洲盃仲喺8強慘吞伊朗3蛋出局，賽後黯然退場。
不過自從大簡離隊後，各大內地媒體呢幾日開始熱煲，話納比99%確認重掌國足，家陣只係等官宣。內地傳媒仲話，納比呢幾日一直留喺廣州同中國足協傾有關回歸嘅事，到近日談判終於有結果，有記者仲喺微博發佈納比喺廣州白雲機場嘅相，似乎真係好事近！
納比喺亞洲盃敗北之後離隊，當時佢仲批評國足球員冇責任心，冇盡心盡力比賽。《米蘭體育報》就話，納比喺一月的確已經下定決心離開中國，但三個月之後就回心轉意。中國足協之後亦曾經想搵奇連士文同軒迪克做教頭，但最終都係認為納比較熟路，所以就請佢回歸。
武球王又要暖凳
另一個國足球迷關注嘅，就係外闖西甲嘅「武球王」武磊，雖然佢喺上輪主場對切爾達射入靚波，但愛奴教練魯比今次就將佢列為後備。愛奴今場37分鐘由沙治戴達開紀錄，半場領先1:0。去到74分鐘武球王後備上陣，佢積極防守，但阻止唔到貝迪斯入波，喺94分鐘貝迪斯開自由球，武磊走漏咗費達爾，最尾俾佢輕鬆射入，最終以1:1完場。