當年讀書，選修一科「經濟思想史」，屬中文大學三院聯合課程，新亞崇基聯合學生一齊到尖沙嘴瑞興大廈上堂，教師係當年之中大經濟學講座教授Axerlod，來自美國，當時冇互聯網資料，大家對呢位教授資歷不大清楚。左丁山以為係講座教授噃，梗係有料啦，點知第一堂至第五堂就非常精彩，之後成個學期都係講番頭五堂嘅內容，反來覆去，完全唔講經濟思想發展，愈聽愈悶。教授久唔久就鬧吓中文大學校園選址錯誤，最記得一句金句：How can you build a campus on a barren rock out of nowwhere，新亞聯合同學聽見就笑，崇基同學就聽到嘴藐藐！我哋如何反應？梗係輪流走堂，有米同學就走咗去海運大廈之Cafe do Brasil嘆咖啡。呢位教授或者與中大互相不滿意，一年後就鬆人返美國，中大冇人再記得佢。
Axerlod頭五堂講啲乜呢？就係講馬克思之Labor Theory of Value，資本家如何強迫勞工加班，長時間工作，強力增加工人之工作時間（working hours）及工作強度（working intensity），勞工勞動產生之價值盈餘（labor surplus）就給資本家抽取、剝削。左丁山當時奇怪點解美國資本主義產出之博士教授會不停講馬克思理論，與中大經濟系流行之凱因斯理論打對台。
估唔到進入21世紀第二個十年代，共產主義中國竟然已經變成一個「中國特色社會主義國家」，盛行「國家資本主義」，容許民營企業以資本主義市場方法壯大、牟利及提供大量就業職位，一啲民營民企更加睇起嚟與美帝企業冇乜分別，可以隨時裁員及加強工人工作強度。最近大資本家兼共產黨員馬雲公開講，年青人要工作996（每日返工朝九晚九，一星期六日），即每周工作起碼72小時，比法國法定工作時間多一倍，十足十係馬克思之「剝削勞工論」。馬雲大概勝利沖昏了頭腦，人之患，在好為人師，佢係師範學院畢業，做過教師，發達名揚天下之後，不時周圍演講，以為自己一言為天下法。但講多就會錯多，今日中國已不是文革乞米時代，及人均GDP超過8000美元，人民就會增加「休閒的要求」，休閒效用（utility of leisure）不斷上升，對996那會聽得入耳。30歲以下嘅年輕人，全世界都如是，唔鍾意在星期六日返工，995唔緊要，996就係轉工的理由。美國矽谷之科技巨企為吸引專才，將工作地方稱之為「校園」，容許僱員帶寵物返工，徹底摒棄傳統寫字樓式與工廠式之緊張工作環境，阿里巴巴亦是科技巨企，馬雲點解唔學吓矽谷，竟然提倡996呀，既是黨員，唔該再讀「勞工價值論」！