林鄭市長玩晒 - 陳也

林鄭市長玩晒 - 陳也

內地女影迷九成做媒,睇《復仇者聯盟》聲稱因為劇情傷感,慟哭不止,呼吸困難,被急送醫院,證實換氣過度,吸氧後無事。復仇變缺氧,登上新聞,另類宣傳,催熱票房。漫威英雄,上集的死剩種,這次盡地一煲,壯烈犧牲,是無須劇透的必然。女觀眾還會天真相信英雄長做長有?係咪腦壞咗,如果係,150個移居香港名額實預佢,愛國多過愛港的新香港人,迫爆住滿明日大嶼,本土香港人死剩一半?有幾傷感先,大把內地配額速遞補充,美國隊長鷹眼蜘蛛俠,淘寶大量供貨,版權?無差啦,習帝川爺,早就枱底做好交易。所以呢,我選舉主任上身,唔信納叻過舟舟的內地女人會為漫威英雄哭昏。香港就唔同,林鄭市長可能很快就會出淚功,哭訴遭泛民欺凌,反住好姐妹大話驊那雙白眼含淚控訴「佢地一心想迫我辭職」。好打得變好喊得博到的同情應該與淹到上佢鼻哥的嬲嬲一樣。戲迷估吓林鄭市長會為哪位復仇英雄落淚?黑寡婦顧全大局,跳崖而不是跳船,喊得過吧。作為市長,最投入的一幕,是雷神大斧一揮斬甩魁隆個頭。她給那個頭扣上港獨帽子,拎住個頭上京邀功,習帝一定畀讚,還給個親哩。林鄭市長你玩晒啦!