前日13萬巿民上街反對「送中」惡法之餘，亦冇忘記可能要就佔中案上訴嘅佔中九子。一直支持佢哋打官司嘅守護公義基金信託人何秀蘭（Cyd）同八方講，基金喺前日遊行籌到自2016年成立以來最高嘅捐款額，總數超過270萬元，其中基金喺灣仔街站，同工黨為基金喺銅鑼灣開設嘅街站，已合共籌到230萬；小麗教室街站都為基金籌到41.18萬元，呢條數仲未計眾志同人力為基金所籌嘅款項，估計金額會再增。
何秀蘭認為巿民踴躍捐款，同政府用古舊惡法檢控佔中九子有關，相信唔少港人對九子代替爭取民主嘅香港人被審判感同身受，加上「送中」條例將衍生更多冤案，林鄭可將港人移交比蔑視法治人權的共產黨，香港人都要自救，因此大家都願出多一分力，更加團結。
社民連籌74.42萬
除咗守護公義基金籌款數字破紀錄，巿民力撐嘅佔中九子之一、黃浩銘所屬嘅社民連籌款都唔錯，社民連主席吳文遠同八方講，社民連前日籌到74.42萬元，相信巿民踴躍捐款源於對政權政治打壓憤怒之外，亦係支持阿銘同九子上訴。
李八方