【安心偷食】許志安和黃心穎本月中被爆喺車廂內「偷食」，黃心穎前日低調飛美國避是非，人夫安仔喺記者會上聲淚俱下道歉，宣佈暫停所有工作，他原定今年9月紅館舉行個唱亦取消。
安仔演唱會取消，但老婆鄭秀文（Sammi）卻要為7月演唱會備戰，自決定原諒安仔後，Sammi生活重回正軌，她噚日喺IG貼出做gym相後留言：「傷了腳之後很久沒運動了，萬事起頭難，但沒有藉口不努力了，今天終於放膽爆爆汗。」運動後又跟安仔嘅愛犬Lucky仔慶祝14歲生日。
紅館爭崩頭
安仔9月紅館檔期，原來不少藝人虎視眈眈，杜汶澤早前出席活動都開玩笑話：「如果我攞到個期，幾多錢我都畀。」據知阿澤真係有意入紙申請該檔期做棟篤笑，不過亦有傳林盛斌（Bob）都想要呢個檔期搞棟篤笑。其實陳小春、林奕匡、周國賢、陳柏宇、RubberBand和BOYZ等，都會拗手瓜搶檔期。阿澤噚日話：「紅館騷我交咗畀製作公司搞嘅，佢哋話如果一有期就會入紙。佢哋會密切留意，我唔知佢入咗未。我自己梗係希望入到，原本計劃下年先搞棟篤笑，但係如果9月有期，梗係9月啦。我知紅館期好難攞，順其自然，平常心。」
麥媽被認錯
「安心偷食」隨着時間丟淡，但曾被指跟麥明詩撞樣嘅麥美恩，其母近日卻被人認錯係黃心穎媽咪，喺加拿大遭街坊「點錯相」。麥美恩噚日喺中環出席活動時話：「我諗有少少誤會，其實我媽咪好易認，肥嘟嘟，好師奶。而佢（媽咪）之前都喺節目出現過，其實都唔難認。唔擔心，媽咪有自己工作同家庭生活，佢都唔會太在意，亦唔會受新聞影響。」
「安心偷食」爆出後狂抽水見報嘅落選港男梁裕恆（Flow），噚日又話最後一次講，暗示馬國明同心穎只係觀眾鍾意嘅情侶檔，佢又爆料：「今日又有另一條契弟出嚟話我抽水，呢條契弟喺娛樂圈壞事做盡，曾經想夾一個女藝人上房，最後傾唔掂數，對人講咗句『你以後冇運行』，自己周身屎嘅人，做咩要提及我啲小人物，抽我水呢？」
撰文：馮仁昭