佔中四子入獄前寄語公眾，4.28為香港人走出來，上街反對修訂《逃犯條例》，相信四子都好欣慰，香港人冇令佢哋失望。不過，除咗用雙腳表達支持，亦都可以用雙手，就係寫信鼓勵佢哋。須知道獄中生活刻苦，甚至會忘記時日流逝，相信大家嘅一字一句，可以令牢房內嘅四子感到同外界嘅連繫。若果佢哋係「an Everyman」，咁「Everyman」至少可以用一封信，話畀佢哋知「they are not alone」。
寄信行動由「香港天主教正義和平委員會」發起，並會代為轉寄市民信件，佢哋希望支持真普選嘅人，都可以用文字撐四子，郵寄地址係「香港西灣河耀興道72號聖十字架中心6樓」。
但要留意幾大要點，包括寄信記得付足郵費；信內唔可以包含色情、人身攻擊內容及粗言穢語；最好將相片印埋喺信紙上，但信件包含嘅圖片或相片，唔可以係在囚者嘅個人獨照；如果想寄慰問卡，記得卡上唔可以有閃粉。如果想收到回信，就要喺信內寫上回郵地址同姓名。