數今季英超最出色嘅球隊，不外乎曼城或者利物浦，而最出色嘅球員相信大部份人會投史達寧或者華基爾雲迪積克（VVD）一票。
雲迪積克膺英格蘭球員先生
周日英格蘭職業球員工會（PFA）頒獎禮，紅軍守將VVD先贏一仗，獲選為PFA年度最佳球員，亦即係英格蘭球員先生；藍月嘅史達寧就只獲選為年度最佳年青球員。不過史達寧喺短短唔夠一日即威番次，獲英格蘭足球記者協會（Football Writers' Association，FWA）票選為今屆英格蘭足球先生，打和喇。
紅軍今季喺英超暫時有19場保持不失球、僅失聯賽最低嘅20球，27歲嘅VVD成為繼上年嘅穆罕默德沙拿後，連續第二位獲選為球員先生嘅利物浦球員，亦係繼伯金、雲尼斯達萊同尹佩斯之後，第四位攞到呢項殊榮嘅荷蘭球員。
史達寧失落球員先生獎項唔緊要，唔夠一日即刻贏番VVD一次，佢喺FWA英格蘭足球先生評選中，獲得62%的選票下成為今屆英格蘭足球先生。之前兩屆足球先生同球員先生都係由同一名球員獲得，分別係17年嘅尼高路簡迪，同埋上年嘅穆罕默德沙拿，到今年情況終於又有唔同，同英超冠軍爭持一樣咁激烈。
