迪基亞又甩轆，英超曼聯又失分！周日英超曼聯主場對車路士嘅重頭戲，紅魔雖然由桑馬達先開紀錄，但由於迪基亞之後送禮，最終只能打和1:1，繼續排第六同車路士、阿仙奴爭前四。
桑馬達先開紀錄
曼聯近三場全敗兼一球不入，爭入前四形勢被動。為咗全力搶分，曼聯領隊蘇斯克查將盧卡古放番入正選陣容，老將桑馬達亦都攞到上陣機會。車仔嘅變動唔大，只係用高華錫代替咗巴克里。
一如所料，紅魔一開始就搶攻車仔，用咗短短嘅11分鐘就打開紀錄，盧卡古送出過頭波畀禁區嘅勞基梳爾，佢第一時間傳畀入楔但冇人睇嘅桑馬達一射入網，領先1:0。紅魔之後繼續贏形勢，但搵唔到保險球，最終喺臨完半場之前畀車仔追平。紅魔失球嘅最大罪人係近排好多失誤嘅迪基亞，喺43分鐘佢接唔實車仔中堅魯迪格嘅遠射，畀殺上嚟嘅馬高斯阿朗素快腳將個波送入網，半場追成1:1平手。下半場再冇入波，維持相同比數完場。
因為阿仙奴同日作客以0:3不敵李斯特城，所以今場波後前四形勢冇變過，車路士以68分排第4，阿仙奴66分排第5，曼聯則以65分排第6。目前聯賽只剩番兩輪，曼聯要爭前四嘅話一分都不能失。
近4戰3度犯錯
講番紅魔嘅失分罪人迪基亞，佢近嚟狀態真係差到爆，根據Opta嘅統計，今次已經係迪基亞各項賽事近4戰第3次犯錯致失波，追平咗佢之前123場為紅魔把關賽事因犯錯而失球嘅總數。要數迪基亞今季最經典嘅失誤，莫過於歐聯八強次回合對巴塞隆拿嘅賽事，佢接唔實美斯嘅射門，累球隊失波。
雖然如此，迪基亞依然獲領隊同埋隊友支持，蘇斯克查話：「大衛知道嗰一球可以做得更好，冇理由去隱瞞，但我哋唔會怪佢，因為他佢救咗我哋好多次。」馬達亦強調迪基亞嘅貢獻毋庸置疑，大讚對方係曼聯近幾年最好嘅球員。