【本報訊】42萬呎大嘅新田購物城正式開業一年，已經嚇怕唔少租戶，皆因靜到鬼影都無隻，同搞手之一嘅民建聯黃定光（圖）當初預期「一日萬人」好大出入。雖則城規會上年先續約，話可以「容忍」多三年，但象哥似見勢色唔對，最近同傳媒大爆有意將購物城轉型做「漁農產品展銷場」。有租戶上個月就收到律師信，俾人追一整年租金，每呎要30元租金同7元管理費，但自願離場就唔使畀。
現租戶唔開舖 慘收律師信
上年9月前進駐新田購物城嘅租戶都仲有免租優惠頂住，但如今日日水盡鵝飛，有人寧願唔開舖，反而收到律師信指違約，要倒貼過去一年租。有指係管理公司覺得租戶唔開門搞到購物城失色，所以出信逼佢揀一係交租、一係交吉。
象哥當年一心想吸納自由行客消費，城規會先批准用元朗私人用地同相連政府用地，可惜三年又三年，最終都要跪低轉型。八方好奇城規會上年先續約到2021年，「購物主題樂園」一下子變身做「街市」，同當初承諾帶動香港旅遊業已經好唔同，更何況唔知過唔過到渠務、水務同消防要求呢？