前曼聯球星朗尼曾經召妓係公開嘅秘密，不過前妓女、當年3P主角之一嘅海倫活特（Helen Wood），喺五月底出版嘅新書《A Man's World》入面爆料，話朗尼（小圖）喺一次出軌後，畀佢睇當時大肚嘅老婆高蓮照超聲波嘅BB掃瞄相，深感內疚嘅朗尼仲喺浴室度伏喺佢膊頭痛哭。
33歲嘅朗尼早已被揭曾喺2009年7月高蓮懷有5個月身孕嗰陣，同海倫同埋另一妓女珍妮湯遜喺酒店大玩3P，但有消息指，海倫喺新書中強調與朗尼嘅聯繫唔止一次，兩人曾多次喺唔同地方接觸。「海倫話，朗尼向佢展示掃瞄相嗰陣，喺套房浴室喊咗出嚟，海倫話朗尼覺得內疚，因為朗尼意識到自己做緊嘅嘢係罪大惡極。」
里奧阻勸 曾爆衝突
另外，書中亦提到，朗尼嘅前曼聯隊友里奧費迪南，曾經因為朗尼同海倫嘅不忠行為，而發生激烈衝突。據悉，里奧費迪南喺曼徹斯特一間賭場見到朗尼同海倫親密調情後，即刻知道佢哋發生乜嘢事，里奧費迪南直斥朗尼係白痴，指朗尼唔應該咁做，特別係喺公眾場所。