又話巴黎聖日耳門（PSG）喺法國超晒班，點知今季踢踢吓，最後只剩番一個法甲冠軍喺手。呢隊球星如雲嘅億萬大軍，上星期六對雷恩場法足盃決賽跌爆大家眼鏡，喺領先2:0嘅優勢下竟然被對方追和2:2，最後互射12碼輸5:6，五連冠夢碎，連同之前喺八強出局嘅法聯盃，今季兩項本土盃賽都拎唔到，今季先新上任嘅杜曹真係羞家。不過，上星期六晚最羞家嘅肯定唔係杜曹，而係賽後上台領獎嗰陣打雷恩球迷嘅尼馬，輸波又輸品，仲好大機會俾法足總秋後算賬，有機會要坐波監。
麥巴比領紅成轉捩點
養咗傷成三個月嘅尼馬，呢場波係佢復出後首踢正選，如果只睇上半場，仲以為佢可以成為球隊嘅捧盃英雄，皆因佢13分鐘先助攻同胞丹尼爾開紀錄，然後21分鐘又單刀建功拉開比數；點知球隊下半場被逆轉，俾對手追和2:2後要加時，基利安麥巴比仲領紅被逐，去到互射12碼，就因為後備上陣嘅小將尼干古喺第六輪宴客，結果輸5:6，以總比數7:8落敗得亞軍。由天堂跌落地獄嘅尼馬，心情梗係差，賽後步上頒獎台時就不滿一位用手機拍緊佢嘅雷恩球迷，用手拉開對方部手機後仲同人嘈起上嚟，而EQ一向低嘅尼馬，疑似揮拳打中對方面部，成個過程就俾人拍低晒，睇嚟法國足總睇完後，肯定會做嘢。
尼馬除咗今次又衰衝動同敵軍球迷起衝突，其實賽後好多自家球迷都一樣不滿佢，皆因賽前佢被發現飛咗去意大利拍廣告同遊山玩水，加上佢最近亦是非多多，日前先因為喺歐聯16強出局後爆粗轟VAR同球證，被罰要喺下屆歐聯停賽三場。不過，唔只尼馬衰，佢嘅拍檔麥巴比領紅被逐，都要留意自己啲紀律！
雲格肥賓或取代杜曹
PSG今季睇嚟搵錯人帶隊，杜曹除咗冇辦法改善球隊喺歐聯嘅成績，再次16強出局，今次仲要中止埋球隊喺法足盃29連勝嘅走勢，如果計算所有法國本土盃賽決賽嘅話，今次就係自2011年以嚟嘅首敗，難怪賽後又傳球會想搵新帥，雲格同賓尼迪斯都係候選人。至於雷恩就威，隊史第三次贏得法足盃，距離上次奪標足足有48年咁耐。