呢排寫得醫療問題多，偶遇一位年輕中文大學醫學院畢業生，在公立醫院工作超過十年，問佢做成點，佢話已經做到冇晒心機，日常既做門診睇病情複雜嘅病人，又有急症室急call，再加一啲文書工作，幾乎做到鞠躬盡瘁，死而後已。卒之因為其他原因，索性辭職移民去也，於是公立醫院又流失一個本地醫生。佢話坦白講，如果醫院工作環境好啲，佢都唔想因為其他原因鬆人嘅，畢竟自中大醫學院畢業後，曾有一顆服務本地病人之熱誠。這份熱誠，十年來被長時間工作折磨，燃燒晒。左丁山問佢究竟怪邊個？佢話無謂講。
做得咁辛苦，點解要反對輸入外援？佢話支持外來醫生考試合格後註冊，不用做實習，所以對醫委會投票結果，非常失望，再問深入啲，原來佢話醫生界好怕大陸醫生入侵（呢點左丁山早已聽過，一位中環名醫就同左丁山講過，輸入醫生，可能就係輸入暨南大學醫生，問左丁山驚唔驚？），據講現在已有「醫生考試補習社」，開到成行成市，補習生就係大陸醫學院畢業生，無牌西醫。
老實講，左丁山又唔怕睇大陸醫生噃，大陸醫生都有好多有料之人，當然亦有南郭先生，如單單仿用新加坡模式，規定只有有資格名單內之頭100間醫學院學生先至可以來港，大陸名校如排在名單內，咁又有乜好怕？遠在1976年，左丁山患有嚴重鼻敏感，讀中學時年輕，因荷包燶丁，一直冇醫過。到咗1976年，已在銀行打工，月薪近三千元，於是憑朋友介紹到旺角東樂戲院後面一間大廈，睇一位來自北京大學嘅醫學教授，做針灸電療，做咗半年，冇晒鼻敏感，到依家都冇復發；原來嗰位教授本是西醫，在港不能掛牌，於是靠針灸搵食，針灸時就教左丁山到藥房買一啲中藥、西藥紓緩鼻敏感。呢位北大醫生真係好掂，收費又平，好快就口碑傳開咗，其門如市，兩年後左丁山介紹朋友去睇佢，佢話：「多謝咯，我就快儲夠錢移民澳洲，好辛苦先至靠關係走來香港，香港19年後回歸祖國，我怕怕，走先咯。」其實內地亦有不少良醫嘅，怕共產黨不必連大陸醫生都怕埋，佢地考試及格在公立醫院工作四五年之後，可能更願意到各區做基層醫生，收費便宜啲，對香港市民有乜唔好？本地西醫唔駛用內地醫生呢樣嘢嚟嚇人嘅。