外國朋友唔知，會以為我城最崇拜差佬，不單止狂拍警匪片除暴安良，還特別鍾情卧底題材，刻劃公僕孤身犯險，九死一生，例牌仲要含冤受屈，被猜疑、出賣，甚至壯烈犧牲，感人肺腑，感足幾十年，來到至今大台劇《鐵探》。
小時候和同學討論投考警察，有人想做藍帽子，有人想做CID，我話我想做卧底──真的，我曾經誤會卧底係一個部門，大到好似軍裝咁。
周圍道道無間道嘛。剛獲金像獎最佳導演的莊文強，其成名作《無間道》第三集《終極無間》便夠晒終極，何止劉華朝偉係卧底，連中國最大犯罪組織首領陳道明都係公安，深入虎穴多年搜集證據。想深一層，若非起初陳道明投身黑幫建功立業，黑幫怎得以壯大？倒果為因，扭來扭去，為批文為政治正確，讓國家執法機關攞盡威。
大陸公安也罷，特區差佬也罷，誰知恰恰相反，香港人幾時如此尊敬警察的？由傳統「好仔唔當差」觀念，到近年「慈母」、七警罪成入獄，重重矛盾，明明現實裏藐爆，影劇裏卻讚到天上有地下無，名副其實做戲咁做，算否自我欺騙？社會學分析指源於殖民地身份認知構成情意結喎，多餘，純粹貪卧底題材容易寫。你信差佬會忍辱負重嗎？發洩打市民就多。
還有，每逢看到明星扮演高級警務人員，我就忍唔住笑，並非演得不好，而是怪演得太好。《寒戰》兩位警務處副處長梁家輝和郭富城劍拔弩張七情上面呀，新近《鐵探》惠英紅和黃智賢照抄一場鬥大聲嗌交戲，皆精彩。至於神不神似？留意番，我城一哥們，是Sorry Sir，是禿鷹，現任那位則驚驚青青，總之毫無霸氣，影帝影后over acting，把庸官抬舉了。上溯保安局局長，照計地位更高吧，前任包括掃把頭、會夾着男裝手袋檢閱紀律部隊的李少光，當下李家超八字眉似店小二，硬推送中條例時，又似自己都信唔過自己的hea做經紀。再一次，理想與現實落差。
肥皂劇得啖笑，無可厚非，但千萬別認真，尤其誤導貴子女志願做警察好型，將來魚肉百姓神憎鬼厭，可後悔莫及。睇新聞增廣見識，咪識來識去識條鐵探！