台灣富千金、名媛張翡玶的父親為投資富商張世駿，在美國讀書時張翡玶認識了香港一班「誌同道合」的富二代，畢業後扎根香港成為時尚界KOL的始祖，張翡玶看好KOL的前景，「整個行業嘅專業性都會提升，大家應該會越嚟越注重KOL真正嘅影響力同數據。」
撰文：羅慧敏
攝影：林德雄
張翡玶談起走入KOL（Key Opinion Leader），「當初算是機遇巧合，我只係一直鍾意時裝同時常參與一啲品牌活動，啱啱Instagram開始興起，慢慢建立一啲followers嘅時候，就有個management agency搵我，問我係咪有興趣建立個人網站，就咁樣開始咗KOL之路。」
獨特見解風格
對於「成功KOL」之名，張翡玶愧不敢當，「比起好多內地、外國非常努力經營自己嘅社交媒體、非常專業嘅KOL，我真係擔當唔起呢個稱號，相比之下我只係將社交媒體融入自己原本嘅生活同愛好。整個過程我覺得最有成就感，除咗得到合作品牌同媒體朋友嘅認同，就係喺Instagram上同世界各地嘅followers交流，我哋會分享人生經歷、旅遊心得、食譜，有時會收到message話喺某方面受到我嘅正面影響，我覺得好開心。」
名媛KOL與其他KOL本是分成兩個不同區域，近年兩者開始重叠，張翡玶說：「其實名媛點解唔可以係KOL呢？好處係通常我哋啲followers本來就對我哋嘅生活有興趣，而唔係只為咗穿着打扮而follow。而且合作嘅品牌都係我一直都鍾意用、鍾意着，所以合作關係好自然同真實。」現時很多人都會以KOL自居，「KOL最重要係opinion，只要你有獨特見解同個人風格，自然會有知音人。呢個市場呢幾年來成長得好快，相信趨勢唔只係單純嘅擴大，整個行業嘅專業性都會提升，大家會越嚟越注重KOL嘅影響力同數據。畢竟靚嘅相係一回事，係咪可以影響到觀眾又另一回事。」
收入不及分享
張翡玶不在乎當KOL帶來的收入，做到分享才是她的目標。問到有否聽過KOL的最高收入？她說：「有聽過意大利嘅KOL Chiara Ferragni一年賺幾百萬美金，仲成為哈佛商學院嘅研究案例，真係好厲害。」
Crazy Rich Asian
在香港，相信張翡玶是「Crazy Rich Asian」的代表之一，她所過的都是奢華生活，問到對自己的生活有何看法，她說：「我知道因為一部電影嘅成功，令大家額外對所謂嘅Crazy Rich Asians有興趣，但呢樣唔係我想表達，相信識我嘅人都知道呢樣從來唔係我嘅性格或目標。大家都鍾意喺社交媒體上分享最靚、最好玩嘅事物，所以呢樣只係生活一部份，如果一直放我去買餸、煮飯、放狗嘅相，大家應該會覺得好沒趣。」
瘋狂婚禮
談到有甚麼事情難忘得令自己也覺得瘋狂，「與其話瘋狂不如話係最花心思同精力，應該係自己嘅婚禮，每次回想起真係覺得好攰，將好多唔可能嘅事變成可能。幾多budget我冇諗，嘉賓都係我哋好重視嘅，只係希望大家開心，係一個好攰、好好嘅回憶。可能受到老公影響，我𠵱家唔會太過物質，有錢就任性當然唔好啦！我𠵱家想做媽咪，都要好好教導下一代。」生活要求？她笑說：「我對生活要求好簡單，我只想做一個好老婆、好嘅朋友、好嘅女兒，將來成為一個好媽咪。過咗30歲之後越嚟越覺得做任何事，都要以感恩嘅心態對待，𠵱家都係家庭為主。」
更多精采時尚內容，盡在 http://add.appledaily.com。