周三晚大部份球迷嘅焦點都落喺曼市打吡，但同時間喺西甲賽場，中國前鋒武磊喺愛斯賓奴主場對切爾達嘅比賽，再次正選上陣。而且佢喺33分鐘接應隊友長傳，射入一球靚絕嘅凌空掛射，係「武球王」轉投西甲以後嘅第二球。賽後，中國媒體同埋網民當然係狂吹「武球王」嘅神勇表現喇，仲有網友話激動到喊！
望武磊成為西甲孫興民
周三愛斯賓奴主場鬥切爾達嘅比賽，武磊重返正選陣容，而且表現非常活躍。到咗上半場33分鐘，愛斯賓奴前場幾次短傳配合，中場馬克洛卡見到武磊由禁區外入楔，乖巧咁送咗個過頭波入禁區。而「武球王」控都唔控，快對手出迎嘅門將魯賓白蘭高一步半車身掛射入網。武磊上一次喺西甲入波已經係3月2日嘅事，最終相隔54日終於成功打破入球荒，入波之後佢都相當興奮，除咗振臂高呼之外，仲猛錫球會會徽表忠！
上輪坐冷板今場做英雄
雖然最後雙方打成1:1平手，但「武球王」嘅表現受到高度評價，中國媒體當然不遺餘力猛吹「武球王」，有啲就指武磊嘅入球係贏在佢嘅世界級走位，而且射術一流、有啲就話武磊入波之後全場狂嗌佢個名四次，成功用表現證明自己喺西甲賽場值得佔一席位，可以成為球隊常規正選、仲有唔少講希望佢可以好似孫興民咁，成長為擔起球隊嘅巨星。
不過，變得最快嘅都係廣大中國網民。話說周日愛斯賓奴作客鬥利雲特嘅，武磊喺後備席坐足90分鐘，係佢自1月尾加入球會之後首次1分鐘都未踢過。賽後憤怒嘅網民就走去愛斯賓奴嘅微博留言討伐教練魯比，仲表明「要不是有武磊，誰理你愛斯賓奴的死活！」但噚日愛斯賓奴喺武磊入波之後出咗個「請！相！信！他！」嘅貼文，大家就好似咩事都冇發生過咁去留言吹奏「武球王」，唔少網友都話見到「武球王」入波真係冇白費深夜睇波，有啲仲話睇到入波之後激動到喊，興奮到瞓唔着，認真誇張。
噚晚西甲其他賽事，馬德里體育會主場贏華倫西亞3:2，保住聯賽次席。