一位泰國老友居港多年，廣東話講得唔錯，還是帶有鄉下潮州口音，講國語則是台灣口音，皆因佢奉老闆之命，由泰國來港負責台港事務，後來大陸開放，又要頻頻北上，主要係去上海。因是之故，呢位泰國朋友對大中華情況非常熟悉，去年韓國瑜競選高雄市長，佢一早就話：「台灣競選要有捐款人，俗稱金主，韓國瑜嘅金主係郭台銘。」競選要金主，呢樣係肯定嘅，九七前左丁山與本港傳媒訪問團到台灣，由江素惠女士安排：見過幾位未來政治明星，包括馬英九、胡志強及王金平，王金平就同我地講過，競選立法院要一億元新台幣，我地嚇咗一跳，心諗呢個政治債務不知他日如何償還。
競選在在需財，韓國瑜打勝仗當然係靠自己，但若無金主支持，是否可以起飛，係一個疑問，你估個個都係特朗普，初期競選經費可以自己負擔晒咩。韓國瑜之競選口號，係「高雄發大財」，政治口號全無台灣式文藝腔、理想腔，睇落好市儈。嗰啲求財口號在最金錢現實嘅香港提出來，恐怕都會俾人鬧餐懵，但竟然在台灣，特別係高雄，人人歡迎，統統受落。當上市長後，韓國瑜周圍出訪，似足係高雄Top Sales，到處攞訂單，明益農民，於是民望大升，如果佢競選總統，勝望高過蔡英文、賴清德。呢個現像反映咗，台灣表面上講溫馨人情，溫柔小品，開咖啡店享受休閒生活，實際上大部份人民眼見多年經濟不景，薪酬停滯不前，就業前途黯淡，早已向錢看，講錢最實際，講理想無謂，故此綠營大本營高雄市也落在國民黨手上。
前星期在飯局上，問泰國朋友「你估韓國瑜會唔會競選總統？」佢答：「要問過郭台銘囉！」左丁山話：「唔駛啩，其實佢會最擔心如果上任高雄市長未久，就捨高雄而去，會對唔住高雄，對唔住選民，政治上實在不負責任。」泰國朋友大笑：「左丁山你係儍瓜，台灣人講政治邊會講咁多責任，邊個唔想做總統呀，如果佢啲金主OK，韓國瑜點會唔選！」哈，言猶在耳，竟然係金主郭台銘出嚟宣佈參加國民黨總統候選人初選，而民調立即顯示佢會贏蔡英文或賴清德。郭台銘係工廠巨富，全無政治經驗，面對台灣之複雜政治環境（台獨、九二共識、中共打壓、封殺、美國表面撐腰），實不知從何做起。特朗普能，郭台銘不能？台灣不比美國，美國大把一流人才可以補特朗普之不足，台灣邊度有呀？但台灣人仍然咁睇高郭台銘，拆穿了又係講銀紙，希望郭首富可以為台灣經濟再創奇蹟，再度興旺，老薑布殊輸畀新仔克林頓，就係嗰句：「經濟呀，蠢才！」