英超爭標形勢緊湊，就連前四席位一樣爭崩頭！禮拜二晚英超補賽，三哥熱刺迎戰要為護級努力嘅白禮頓，全場射咗29腳終於靠丹麥球星基斯甸艾歷臣完場前兩分鐘一箭定江山贏波，延續「無敵」新主場嘅氣勢。賽後領隊普捷天奴大讚艾歷臣「不可思議」，仲話球隊只要做好本份，就肯定拎到英超第三咁話！
艾歷臣臨完場奠勝
賽前仲排緊喺第三嘅熱刺其實非常好彩，事關上一輪佢哋輸咗畀曼城後，其他爭四分子竟然齊齊失分，其中車路士打和咗般尼，阿仙奴同曼聯仲要輸埋，所以熱刺今仗只要贏波，就可以擴大第三位嘅領先優勢。
事實上熱刺實力明顯比白禮頓高一班，一開波就撳住對手嚟打，不過要搶分護級嘅白禮頓非常頑強，以血肉長城嚟頂住熱刺嘅狂攻，其中兩名中堅李維士鄧克同沙恩杜菲，先後瞓身演出護空門，幫白禮頓半場守住0:0。下半場客隊繼續死守博一分，結果熱刺就算瘋狂射波，都過唔到白禮頓門將馬菲賴恩嘅十指關。
眼見就嚟完場之際，熱刺中場艾歷臣突禁區頂推順左腳射門，個波成支箭咁飛向龍門嘅左下角，今次馬菲賴恩飛到盡都救唔到，結果熱刺就靠艾歷臣喺88分鐘呢一腳神奇遠射，一球小勝白禮頓。賽後領隊普捷天奴就大讚艾歷臣係不可思議嘅球員：「艾歷臣嘅表現令人難以置信，佢有能力喺球隊困難嗰時入波，我希望佢未來會留喺熱刺。」
熱刺贏波後以35戰70分排喺第3，新主場喺4月開幕後踢咗4場波全勝（見附表），入咗八球仲要冇失過波，剩低三場聯賽分別對踢緊風流波嘅韋斯咸、般尼茅夫同愛華頓，當中兩場喺主場踢，難怪普帥都話熱刺手握主動權，贏晒三場就攞硬英超季軍，繼續有歐聯踢喇！
沙恩朗7.69秒最快入波
至於禮拜二晚另一場英超，修咸頓作客1:1逼和屈福特，其中聖人前鋒沙恩朗，一開波就截到主隊後衞卡夫卡特嘅解圍失誤，單刀將個波挑過屈福特門將賓科士打射入，開波7.69秒就入波，打破咗熱刺京治2000年12月鬥巴拉福特嗰陣，所創下9.82秒嘅英超最快入波紀錄。不過修咸頓無辦法將一球優勢守到尾，去到90分鐘俾屈軍安達格雷射入追平，兩隊握手言和。