政治漫畫家黃照達2013年為和平佔中運動設計標誌，以中空圓形配上站在圓形之上的小雀構成，寓意港人就似小雀般，以微小但和平的力量進行佔領，但呢個極具象徵性嘅標誌，隨住佔中九子案判刑，意義已經同當初好唔同。
和平爭民主最後竟然係要坐監？黃照達特別喺判刑後於facebook發表新標誌，中空圓形加咗多條直線，空間變成牢獄，但雀仔仍然站立不倒，佢留言話係藉此向每位為香港民主付出過嘅人致敬，並附上respect（尊敬）同freedom（自由）嘅hashtag。
八方問過黃照達，佢話佔中標誌原先圓形中空，當中嘅留白都想問香港人心入面擺咗啲乜？而喺佔中案判刑後，即時諗到喺原來設計加上一啲直線，令中間嘅圓形變成監獄，但重點就係監獄絕對困唔住隻雀仔，「雖然現實係困住咗個人，但喺心靈、思想上嘅自由，係困唔住嘅」。
雖然大家對佔中案判刑都有心理準備，但佢不諱言聽到結果後，仍然覺得好心酸，覺得九子唔應該面對咁嘅結果，八方相信同佢感受相同嘅港人，大有人在，噚日都有到庭外聲援嘅中大學者周保松都有share個po，網上約定陳健民他日再行山。
李八方