立法會4月初原本要二讀同三讀由會計界議員梁繼昌（圖）提出嘅《2018年專業會計師（修訂）條例草案》議員法案，點知最終因為梁繼昌遲咗入會議廳，不在席而「甩轆」收場，未能動議。
政治形勢氣氛低迷
原本Kenneth希望下月8日將條例草案再上會，但佢已經抽起條草案，等立法會10月復會時再提。
Kenneth解釋，鑑於現時嘅政治形勢同氣氛，唔適宜現時討論呢條bill，所以押後至暑假復會後再交上大會審議。咁又係嘅，佔中四子已被囚，有政黨又叫林鄭落台，家吓嘅政治氣氛實在好低氣壓。
而梁繼昌提出嘅呢條議員法案，目的係進一步禁止無專業會計師資格嘅人或者公司，使用一啲誤導性字眼，令人以為有關人士或公司具有根據《專業會計師條例》下嘅資格提供服務，以維護香港會計業界嘅聲譽同誠信。