大部份人21、2歲大學畢業，Sarah年紀比他們大十多年，別人是追夢不怕遲，她是讀書不怕遲；訪問這天，她頭髮散開、背着背囊，走在校園上，散發點點文青味，步履比在單車場上輕盈多，笑容也多；Sarah其實很愛讀書，2013年完成網上神學文憑後，15年入讀教大健康教育學士課程，17年以一級榮譽畢業，同年她報讀浸大創意及專業寫作文學士課程，預計2023年畢業。
以為一切是預期，想彌補當初中五畢業後就當上全職運動員、身上沒有「沙紙」的遺憾，事實卻不是，慧詩說：「17歲中五畢業嗰個年紀，邊會有計劃，我只係計劃過出國讀書，16年（普林俊教練因隱性心臟病突然離世）想退落嚟，然後去美國讀心理學，最後選擇繼續踩車，出國讀書呢個心願到𠵱家仲未實現。」
讀書，對Sarsh來說不是為求一張「沙紙」，她說：「講起有啲慚愧，我每次完成一個課程，都唔會刻意珍藏嗰張證書，要搵出嚟都幾困難，一個個獎牌反而容易搵，唔似證書得一張紙。或者對好多人嚟講，學習為求一張『沙紙』，但對我嚟講，佢可能係『沙粒』。」
全職踩車兼職讀書
其實Sarah在12年網上修讀神學時曾說過：「我唔係為學位去讀，而係想學書入面嘅嘢。」七年過去，Sarah求學問的態度始終如一，上文說到「沙紙」與「沙粒」，她突然創作靈感湧現的說：「如果我要瞓喺個沙灘上，就需要好多沙，如果冇沙，對我嚟講，唔係去到一個沙灘，而係去咗石灘，瞓上去都唔舒服。」現主修創意寫作的Sarah學以致用，即興創作，留空間給讀者去細想。
難得跟Sarah走在浸大校園，就算下着雨也是賞心樂事，撐着傘的她，罕有地沒被粉絲認出，難怪她覺得校園生活最自由自在，她說：「學校好少有人搵我影相或簽名，佢哋知我嚟係讀書，身份有啲唔同；慶幸初到浸大，就認識幾個志同道合嘅同學，一齊柴娃娃傾偈，佢哋唔會當我高高在上，反而經常笑我，我就係種意呢種同朋友之間真誠嘅互動，呢種純真嘅友誼喺我呢個年紀好難得。」
近期每次訪問Sarah，她總愛將「學業」掛在口邊，就算東奧越來越近，對手密鑼緊鼓爭取每分每秒訓練，她也堅持要完成這個學期的學業，一星期上課兩天，每次三小時，還要應付學校報告及校內試，可幸她找到平衡，她笑說：「朋友都話我變態，我唔太需要hea嘅生活，我鍾意辛苦過後獲得嘅滿足感，好似打完仗後整個人都放鬆嘅感覺；我放假係為咗返學，覺得全職單車、兼職讀書呢種生活幾開心，亦好充實。」
將勤補拙不怕落伍
就算跟同學有年齡差距，承認自己outdated（沒跟上潮流），她也樂在其中，Sarah說：「有時同學談論一啲流行歌，我未必會識，主要係我outdated，唔太留意網絡上嘅事物，但每次聽佢哋講，又覺得好開心，佢哋亦好包容，我唔明白嘅，佢哋真係會解釋畀我聽，令我認識更多唔同領域嘅事，亦嘗試從佢哋嘅角度睇事物。」
讀書帶給Sarah，除了學識外，還帶給她很多意想不到的收穫；Sarah中五理科畢業，之後讀過神學以及教大的健康教育，現在是浸大文學院學生，問她是理性的理科人還是感性的文科生，她選擇後者，Sarah說：「我𠵱家鍾意文學，我唔似其他人識得背誦詩句，但我享受𠵱家讀嘅creative writing，畀我有時間去整理自己嘅思緒；單車場上，永遠都好忙，好難有靜落嚟嘅時候。」
意想不到的還有在課堂上拿到A的滿足感，Sarah形容比奧運、亞運奪牌更大，兩年多前在教大一科叫「痛症教學」拿到A後，激發她讀書的小宇宙，最終以一級榮譽畢業，她說：「嗰次攞A後，先知道滿足感好大，之後好想喺每一科都做好，我唔係讀書好叻或者一目十行嘅人，但將勤補拙都好重要，同踩單車一樣，唔能夠單靠天份，如果唔努力練習，亦唔會取得好成績。」
寄語後輩學業為重
作為香港單車界大師姐，亦身兼教練工作，Sarah寄語新晉車手，在抉擇學業及單車的路時，要停一停、諗一諗，以免日後後悔或埋怨，她說：「如果你正喺單車同讀書二選一，諗唔通嗰陣，我覺得都係先讀好書，讀完書仲可以踩車，除非教練同你講：『你好有天份，若你𠵱家放棄讀書，你一定可以攞到亞洲獎牌』，你就先踩車，否則你喺中學途中放棄學業去踩車，幾年後發現自己唔適合，但身上連一張中學畢業證書都未有，於是開始埋怨，呢樣係我最唔想睇到。」
校園以外，她近九個月的單車事業，可說是打遍天下無敵手，從去年8月雅加達亞運2金，到10月展開東奧計分，她在4站世界盃共奪6金1銅，上月波蘭世錦賽，她連奪凱林賽及爭先賽兩金，是這兩個項目的世界一姐，她歸功於「學業」分散單車上的壓力，應驗一句：「書中自有黃金屋」。