近日大台正在播映嘅電視劇《鐵探》，有讀者發現，劇中有位法官同前工業界立法會議員林大輝好鬼似樣，但諗吓又覺得，大輝冇理由棄政從演啩？以為人有相似，點知套劇播完之後出字幕，竟然真係見到「特別演出」嘅人士包括林大輝，仲同陳敏之、黃翠如齊名。
「我最想演行政長官」
八方梗係問過林大輝為何粉墨登場？大輝話喎，自己做過工商界、社團、政界、教育界、體育界，今次就投身演藝界：「下一步可能從事演藝或廣播界呀！」佢仲自信十足笑住話：「我相信我會紅嘅。我最想演行政長官呀！」嘩，到底佢只係講緊銀幕中，抑或真實生活呢？
至於被發掘「加入娛樂圈」嘅經過，大輝就唔想多講，一時話自己係毛遂自薦，一時又話自己係遇到星探，原來係想留返啲神秘感畀大家喎！