一個人一把傘，政制及內地事務局用公帑印製的「聯合國兒童權利公約」小冊，裏面一直有一把黃雨傘，傘下五個不同國族的小孩撐住。黃雨傘忽然無得留低，今年「被修訂」變成藍雨傘。
問小孩，雨傘是什麼顏色？「黃色。」林鄭肯定挑眉搶咪：「衛生署唔夠醫生，少四成咁多醫生喎，影響好多學童保健的小朋友唔夠醫生睇。所以個細蚊仔有色盲，家長都唔知囉。」學童保健有審計署fact check，預約體檢但甩底冇出席的學童有五成以上，衛生署缺人？慘情與公院醫生一樣？安心篤數，已成林鄭畸形管治的常態！短時間內強推逃犯送中條例，急於邀功求寵於習帝，連建制派石禮謙都迫住爆罵「仲衰過共產黨」！一錘定音，確證2.0已經超越宇宙最閒的梁大叔！蛾毒過狼，投過777票的建制與商家，蘇州過後無仇報，林鄭政權，衰過共產黨，唔使等到年尾，榮登2019年度十大潮句榜首。今天，佔中九子判刑，林鄭鐵定黑臉，以「我作為特首……」例牌開場白訓斥外商外媒。雨傘，是佔領運動的聖母院，劫後必將重生。壞咗嘅人，以林鄭居首，搵得返自己靈魂嗎？