很多年之後；又或者唔使等咁多年，事實擺在眼前，都要搵食㗎……有一晚你搭的士，咁好彩，個司機證上顯示名字為黃心穎、梁裕恆、心穎BB、抽水Flow……之類，千祈咪大驚小怪，都唔好即刻落車；人誰無過，何必落井下石打落水狗？
你夠膽第一個擲石？
世事只分東窗事發定暗渡陳倉？眉來眼去揸手摸奶搞JJ、爬灰的爬灰、暗嘴的暗嘴，偷雞摸狗諸事無需焦大去祠堂哭訴太老爺，那東府裏除了門口一對石頭獅子乾淨之外，只怕連貓兒狗兒都不乾淨（註：並無影射任何電影公司、電視機耩，如有雷同，實屬巧合）。
揸的士、揸Uber、揸GoGoVan 之前，如果我係黃心穎或經理人、梁裕恆或經理人，一定乘勢追擊，莫等群眾的心冷卻，無謂悔恨捉鹿唔識剝角。緊記群眾變心很易，一朝瞓醒，托「安心事變」挑撥，更多偷雞摸狗爬灰事件被抖出來，「安心」即變明日黃花，巿場價值插水，那種難堪慘過現時形象插水，黃心穎到時回歸溫哥華連做過街老鼠的賣點都失落才算真的慘！
並非黃心穎未夠班，只是在下極少睇電視；假假哋曾經跟許志安「星光熠熠耀保良」合唱《會過去的》，就算大陸傳媒左一句抦安仔51歲老男人（一國兩制係真㗎；大陸人唔清楚香港男人50一枝花、51歲只屬青年、81歲有心有力大有人在，近年中港婚姻尤其天王、巨星類，有幾個年齡差距不超過二十歲？），右一句如果唔係有個天后老婆鬼有人識？唔該，安仔係實力派之中堅，連至挑剔嘅葉德嫻都樂意合唱《美中不足》、《教我如何不愛他》，可見歌藝超班，無謂來到這些節眼唱佢唱到好似食軟飯至得㗎！
從未聽過黃心穎、梁裕恆個名不重要，一個星期光景，用「五筆」打字，打了個黃，隨後不再霑、淑儀、子華、曉明；而是越級心穎，梁呢？過去非振英莫屬，家陣全屬裕恆。
花開堪折直須折、莫待無花空折枝：打鐵趁熱，拍寫真，拍3級、4仔片屬Old Fashion，不過仍有人受。網絡成立「與世界級姣精共話」，「Flow 哥撐小三」之類平台，肯定火爆，不然風氣一過；揸的士、揸Uber、揸GoGoVan有排你揸。