星期二亞冠盃，澳職球隊做咗中超攔路虎，F組有墨爾本勝利喺主場1:1逼和廣州恒大（FC廣州），但好可惜呢個賽果都係令佢哋要出局，而H組嘅FC悉尼就作客2:2戰和有侯克同奧斯卡杜斯山度士壓陣嘅上海上港（FC上海）。
唔知係咪因為已經打入季後賽，可以有多啲精力應付亞冠盃，喺各自小組都包尾嘅澳職雙雄，呢場波就令到中超隊失分。先講勝利，佢哋賽前一分都冇，但呢場波主場對住恒大，靠積恩咸嘅入球，追和有𤏸博文開紀錄嘅恒大，只不過佢哋餘下兩輪比賽就算全勝，都已經因為對賽成績差過恒大上唔到第二，所以提早出局。
至於H組嘅FC悉尼，賽前亦只得兩分，但呢場波就靠班頓奧尼爾同方祖建功，2:2作客逼和有艾傑臣同王燊超入波嘅上港，但佢哋就未出局，仍然可以後上趕過同組三隊出線，皆因榜首嘅蔚山現代星期二亦只係同川崎前鋒2:2打和，暫時都只係領先五分。