基利安麥巴比禮拜日連中三元，協助有尼馬同卡雲尼後備復出嘅巴黎聖日耳門喺主場以3:1輕取摩納哥，以贏波慶祝提早喺法甲成功衞冕。由於排喺聯賽榜第2位嘅里爾同日較早時作客只能賽和圖盧茲0:0，喺只剩5輪比賽下落後榜首兼少賽1場嘅PSG達16分，PSG未開賽已肯定7季內第6度封王。不過PSG開波都冇手軟，僅僅15分鐘，麥巴比就射入倒戈摩納哥以嚟嘅第一球；呢位法國金童之後再喺38同埋55分鐘接應丹尼爾傳送取得進賬，一度領先3:0。摩納哥要到80分鐘先由高路雲嘅入球而破蛋。至於「戴帽」嘅麥巴比就成為自1989/90球季後，首位喺法甲單季射入30球嘅球員，仲以20歲之齡打破咗里維利嘅紀錄，成為法甲單季入球達30球嘅最年輕球員。