一位老友記校友做校長多年，對教育有熱情有熱誠，退休後執教，不過現在係培訓教師如何升任做校長。佢一畢業就第一時間去當教師，完全唔考慮考EO或AO，一心投身教育事業，係真正願意為教育貢獻一生嘅可敬人士。佢有一位同學亦是如此，當年勸過左丁山：「學校缺乏EPA教師，你主修經濟，又成日搞學生會，做過時事委員會主席，不如你去教書啦。」左丁山答得好冇誠意：「好，如果我在中環搵唔到工，一定申請。」呢位校友聞言大怒，指左丁山市儈。咁就幾十年大家未曾見過面。
校長L某日在某板球會所食早餐Eggs Benedict，雞蛋半生熟，吃過突然身體不適，肚痛肚屙，入醫院檢查，係染上幽門螺旋菌，要留醫兩日。但手頭上有好多工作未完，叫老公帶iPad去醫院等佢發放文件電郵及更改學校教學時間等等，有護士大概做到好疲倦咯，走埋嚟講：「喂，抽血檢驗。」校長答：「我個email還有幾句未寫完，請你等兩分鐘。」護士大聲講：「剩係得你一個病人呀，成個大房都係人，個個要等幾分鐘，我咪好唔得掂？」校長輕聲回答：「唔該啦，將我排到最後先至抽，你做咗其他病人先。」護士大怒：「好叻呀，唔同你抽。」校長L一笑置之，因為佢知道護士如果唔同佢抽血，會違反醫護程序也，果然隔咗個幾鐘頭之後，護士黑口黑面行返轉頭，同校長抽血，校長後來同左丁山食飯，嘆息一聲：「我唔怪個護士，皆因病人太多，病房過度擠迫，護士做到把幾火啫，解決方案係增加護士數目，改善工作環境，但呢兩樣嘢醫管局及政府冇法子做到。好似學校咁，蘋果日報報道某些學校負面消息，講到啲校長恃勢凌人，逼死教師。其實有不少情況係校長想改善，老師慣於安逸，郁都唔肯郁，結成黨派對付校長。有時校董會向校長提出KPI要幾年後將學校由Band 2 升上Band 1，要在校際音樂節，朗誦比賽，體育比賽爭取到名次，甚至攞獎牌，提高校譽。邊個敢反對呢啲工作目標呀？正如黎老闆要記者搶到獨家爆料咁樣啫，但訂下KPI就要睇校長點樣去實施。一個人做晒呀？咪要求各位老師加把勁，兼顧課餘活動，加強教學拔尖補底囉，老師安樂慣，點叫到佢哋加強工作強度？為每個人訂下一個performance KPI呀？商界就常見啫，學校一實施就有人向蘋果爆料話校長逼迫嘅嘞。」左丁山聽見都頭痛，自己有親人做小學副校長，見佢日日辛苦過我哋在中環返工呀！