【西遊記】
以為英超的冠軍追逐戰你來我往已經夠精采，歐聯的八強賽事居然更強，直達讓人看過後會有所覺悟的層次。熱刺對曼城根本是倒模湘北對山王，兩個轉會窗無錢買人，王牌甲哈利簡尼缺陣，王牌乙阿里帶傷死頂，嘔心瀝血地，熱刺竟然奇蹟踢走劍指四冠的哥迪奧拿，熱血程度，比去屆的利物浦有過之而無不及。還不夠阿積士離奇，一班十幾二十歲的年輕人，班費大概等於一間英甲球會，先淘汰爭取四連霸的皇馬，再技術性擊倒季前收購C朗心存大慾的祖雲達斯。窮唔緊要，後生唔緊要，有錢唔係大晒，有經驗有江湖地位都唔係大晒。身處無力感超重的今日，勵志過連睇十次《淪落人》。
當然，經過上星期，大家都清楚，童話的結局多數悲壯。熱刺要倚賴一班殘兵雙線發展，稍有差池，下屆隨時跌落歐霸賽區。阿積士更慘，九成九會被各大豪門煎皮拆骨，又要重新來過，今屆的眼前一亮，可一不可再。不緊要，兩隊下把，必有一隊殺入6月1日的決賽。就算發夢，也可發到最後。
對手，不是巴塞，便是利物浦。曾幾何時，這兩隊也是下把。巴塞下把？係呀！當皇馬豪買施丹買朗拿度買碧咸買費高組成六條煙，破盡紀錄買卡卡買C朗，巴塞是出名倚重自家青訓產品，例如佩奧爾例如沙維例如恩尼斯達，也當然包括美斯。早早被皇馬同化，甚至青出於藍。看3:0擊敗曼聯的賽事，正選11人，剩下美斯、布斯基斯、沙治羅拔圖、碧基，出自拉馬西亞青訓營。重金搶奪古天奴，一季未夠，想賣走；同樣出盡計謀以超高身價引入的迪比利、馬爾甘，大部份時間放入後備席，財大氣粗一如皇馬作風。昔日備受尊重的獨特性，蕩然無存，已被撥入跟拜仁、巴黎聖日耳門、曼聯、曼城等用錢解決問題的球會同類。阿積士中場新星法蘭基迪莊已被巴塞收購，19歲隊長迪歷特也據聞是目標。可以想像，佩奧爾的接班人是碧基，但碧基的接班人不會來自巴塞本身。
一年前，利物浦肯定下把。板凳深度嚴重不足，傷兵多，跌跌撞撞殺入歐聯決賽，給皇馬擊潰。今屆門將由卡列奧斯換上艾利臣，多了幾位球員可供替補，難得主力健健康康，氣勢強過去季多多聲。在英超跟曼城纏鬥到最後，在歐聯連續兩年打入四強，面對巴塞，最大的戲劇張力來自古天奴。埃及美斯遇上阿根廷沙拿，不過戲言；古天奴面對舊主才是貨真價實的衝突。為追夢，蘇亞雷斯由利物浦轉會巴塞，讓利物浦沉淪了一段時間，但走前一季，拼盡全力帶領利物浦爭奪英超冠軍，距離寶座只差一步，一般利迷對蘇亞雷斯感恩多於抱怨。古天奴不同，為轉會，扮過背傷又死不肯留多半季，在普遍利迷眼中，地位可能只比奧雲好少少。
美斯vs雲迪克 似足《足球小將》戲碼
我份人很現實，人望高處，一個打工仔想尋求更大發展而轉換環境，無可厚非。如果個個球員也忠心耿耿，利物浦也不會從修咸頓從羅馬入到好貨。收得足合理轉會費，球員轉會後又沒有奧雲般口臭，算好去好來了。老闆或前上司或舊同事應該做的，是提升自己，讓跳槽員工發現留低的發展原來更大更好。一如十幾年前，奧雲過皇馬無份出場，一走，謝拉特反而捧走歐聯獎盃。去年，差少少，巴塞在八強給羅馬踢出局，利物浦在四強踢羅馬出局，如果決賽爆冷勝出，古天奴唔後悔先奇。今年又有機會，兩隊決戰，巴塞有最扭得的美斯，利物浦有從來不會給人扭過的雲迪克，似足《足球小將》的戲碼。
蘇亞雷斯已在一五年贏過歐聯，心願已圓，古天奴未。身為利物浦球迷，當然希望是高普打破錦標荒。做人不要太貪心？不要一步登天奢望既贏英超又贏歐聯？二揀一，必揀英超！假如巴塞殺入決賽，就全心全意支持對家，無論是熱刺還是阿積士。不為向古天奴報仇，只為一個簡單的現實：當出街食碟叉燒飯動不動九十元港幣，租間劏房要過萬一個月，填個海要千億以上，窮人真係越來越難生存，有錢人又越來越惡。而，錢，我沒有。
撰文：方俊傑
觀塘長大，壹仔打滾，偏愛西片、西劇、中日韓美女。利物浦悲慘球迷，非西人一個。facebook : 方俊傑