社民連主席吳文遠早前眾籌代全香港人問候前特首梁振英嘅《蘋果》頭版廣告，惹嚟全城關注，唔少港人當日搶購《蘋果》留念。原來「喜與為伍」、喺《蘋果》登嘅啜核廣告，陸續有嚟。今日內頁A3刊出嘅《2019年度蘋果廣告閱讀獎》廣告中，689連奪九項大獎，當中寫明「梁振英獲獎無數，獲送機場行李送遞特權」，冇寫限期，應該終身享用。
睇唔過眼狙擊廣告商
睇返689獲得嘅獎，唔少人「恨」唔到。曾經講過「我根本不是搞政治的材料」嘅佢攞到「最強雨傘運動動員獎」，實至名歸；「忠實支持23條獎」落入佢手上都好合理，記唔記得佢講過「一流人才從商，三流人才從政」，至於689係幾多流？呢個問題或者唔使講出口，而話過N屆唔選嘅689奪得「第一個無連任行政長官獎」，唔知會唔會惹嚟剝花生做觀眾嘅唐英年拍爛手掌？
廣告未出，民主黨噚日已經喺facebook預告，《蘋果》今日會有相關全版廣告公佈閱讀獎結果，八方打探過，原來廣告同林卓廷有關，莫非又再對689展開新一輪狙擊？林卓廷回覆八方話，今次廣告係佢一位不屬於公眾人物嘅朋友落㗎，引述對方眼見689成日針對《蘋果》、向廣告商施壓，對此睇唔過眼，加上見到港人對上次眾籌「賀」689廣告反應良好，決定再喺《蘋果》頒獎「鼓勵」，笑指：「我哋覺得689繼續（fb發文針對《蘋果》）咁做，係會刺激到更多人關注《蘋果》廣告，對《蘋果》嘅廣告係有幫助嘅」。
阿廷仲提到，日前見到689連錢志健話要移民都特別發文指要去信入境處沒收錢志健及其家人身份證，「睇到689思維嘅混亂，已去到令人擔心嘅地步，所以我哋要『鼓勵』吓佢啦」。唔擔心689因此再發律師信咩？阿廷反駁：「頒獎畀佢都唔得？全部都係佢啲名句嚟過喎！」佢相信唔少港人都「緬懷」689金句，而呢次廣告就特別註明，「歡迎香港人轉載」。
李八方