特首林鄭月娥早幾日自稱冇政治能量處理佢當選時嘅首要工作，即係改善行政立法關係，可能佢都怕被人質疑，咁佢仲有能力做啲乜？所以噚日宣佈成立香港桂冠論壇，政府仲出埋新聞稿娓娓道來呢個論壇嘅誕生，話目的係為年輕一代提供同優秀科學家交流機會，激發佢哋對科學嘅熱情，論壇將於2021年、即係佢呢屆任期屆滿前一年先舉辦，下月則喺禮賓府舉辦起動禮。為乜無情情搞論壇？北京看重創科創新，娥特緣何瞓身，好易明箒！
娥特就話透過匯聚科學家培育下一代嘅念頭，早喺上任之初出現，靈感來自邵逸夫獎，指論壇籌備工作開展非常順利，舊年輪住同獲得諾貝爾獎、邵逸夫獎嘅學者見面交流，今年1月親自去信所有邵逸夫獎得獎人，介紹兼邀請出席論壇，至今逾三分二得獎人表明有興趣出席，當中六位係諾貝爾獎得主，兩位係菲爾茲獎得主，而喺娥特處理晒前期工作後，今個月主辦論壇嘅委員會先至成立，但原來董事會成員今年2月已經喺禮賓府碰頭，成員包括范徐麗泰同任志剛等，夠晒份量。