立法會長三角四天考察團喺民主派杯葛退團之下噚日正式出發，建制派議員鬧爆泛民事事政治化，咁泛民退出，冇追住話要見領導，其實都係幫建制派去政治化，等個團變成正宗純玩團……啊唔係，係純考察團至真。唔少議員未出發先興奮，可惜考察團出師不利，航班延誤咗差不多兩小時。
考察團一到埗，馬不停蹄去參觀中國商飛C919總裝製造中心，當然又係團友擦鞋好時機。民建聯葛珮帆話呢架C919相當架勢，有158至168座位，航程最高去到5,555公里，佢哋參觀嗰架已經試飛咗100個小時，不斷喺最惡劣環境下記錄測試，包括喺-50°C或超熱天氣下起飛及降落、單引擎飛行、飛入冰雲等，佢話踏入身經百戰嘅機身，「真正感受到我國大型飛機製造事業，即將邁進新的里程碑，毋須再完全倚賴外國進口飛機」。