特區政府硬推《逃犯條例》修訂，聲稱唔係中央旨意，但建制陣營好緊張民情所向，似乎都擔心影響區選選情。有屯門讀者向八方報料，噚日發現多名年輕人以香港研究協會名義喺屯門悅湖山莊外進行民調，只准已登記選民作答，問題包括係咪識得當區區議員民建聯張恆輝、前任區議員官東榮、民協社區幹事王虹銘、上屆候選人葉麗媚，冇問其他地區情況，但就搭單問埋係咪支持《逃犯條例》修訂，選項包括贊成、反對及一半一半三個選項。
呢位讀者話，過去都發現建制派喺區選前會做民調，今次則奇怪加入修例問題。查實修例唔只影響民主派，建制派擁躉成日返大陸，一個唔覺意都中招，不難懷疑建制陣營都驚佢哋嘅粉絲，唔支持修例。喺當區進行地區工作嘅民協黃虹銘就話，透過民調評估實力嘅情況喺區會前好常見，但對於加插《逃犯條例》修訂民調都覺得奇怪，或者因為修例爭議大，可能建制派都想用民調收風。