歐霸盃8強首回合作客布拉格斯拉維亞贏1:0嘅車路士,今場返到主場靠柏度洛迪古斯省兩粒、基奧特射空門,同布軍守將西蒙迪利擺烏龍,半場領先4:1。不過車仔喺換邊後表現大走樣,連失兩球,但最後都以4:3險勝,兩回合計贏5:3晉級,四強首回合將會作客德國鬥法蘭克福。同日另一場八強,阿仙奴憑拿卡錫迪一箭定江山,作客以1:0小勝拿玻里,兩回合計贏3:0晉級,四強首回合會喺主場迎戰西甲嘅華倫西亞。