林鄭不敢動醫委會 - 左丁山

林鄭不敢動醫委會 - 左丁山

林鄭對商界強硬,對醫生界腳軟,人所共知,星期二(4月16日)行政會議開會前,林鄭如常對記者發言,被問及醫委會、醫生一事,答得唔清唔楚,總之就一味話討論不要情緒化,要理性要多啲研究……好明顯佢完全唔想改革醫委會,或立法取回醫委會之專業霸權。香港有不少專業團體,如會計師公會、建築師學會、工程師學會、測量師學會、律師公會、大律師公會,銀行學會等等等,從來冇醫學委員會咁大權力,惡到政府不敢碰一碰,置廣大市民利益於不顧,一於自把自為,醫醫相衞。會計師公會想自主自律,政府不准,要設立一個財匯局奪去會計師公會一啲權力,何故政府對醫委會不敢聞問?政府欠一個解釋!

林鄭唔敢郁,不願改革醫委會,行為與團結香港基金之醫療報告對着幹,但有一啲小朋友仍然不大明白,以為團結香港基金搞分化。直至到其中一位因意外受傷,到公立醫院急症室求診,等咗四小時仍然見唔到醫生,先至知道香港醫療問題嚴重。又有一位議員助理上星期在家中廚房切菜切親手指,流血不止,趕去家居附近一個私家醫生求診,醫生話:「我地冇儀器同你止血縫針,你快啲去將軍澳醫院急症室。」去到急症室,咪等四個鐘頭先囉,碰啱佢平時有「心律不正常」,呢日等候期間緊張起嚟,心房狂跳,幾乎唞唔到氣,度分鐘如年。好彩,最後都可以打直行返到屋企。經此驚恐,呢位議員助理對泛民及民建聯議員都話提出私人議案改革醫委會一事,更加會着緊多幾両(唔止幾錢!)。呢類事例多到數唔晒,全港都知道公立醫院令病人冇晒尊嚴,私家醫生可以令人冇晒荷包,連名人Fit馬(馬時亨)都感嘆乜香港手術費咁貴,澳洲專家施手術可以便宜咁多!可笑嘅係,替Fit馬施手術之澳洲專家不能來港施手術,如要在港執業,首先要考試及格,再在醫院做實習醫生,再要考香港專業試,難關重重。點解唔可以畀呢類專家免試、免做實習醫生就在本港公立醫院做註冊醫生呢?問醫委會啦!香港好多好多專科醫生名片都印上「威爾斯院士」、「愛丁堡院士」一類銜頭,但香港不准英國之威爾斯、愛丁堡院士來港行醫,要佢地再考過試,唔通香港啲醫生係世界最叻?莫樹錦教授可能係世界最叻醫生之一,但佢如要私家執業,要考香港試,跟佢啲學生做實習噃,如此荒唐荒謬事情,林鄭豈能視若無睹,立法會豈能靜默不理!