立法會大會前日先至因為未有足夠建制派趕返會議廳開會,流會收場,估唔到噚日,歷史又重演,今次開唔成會嘅,係根據《議事規則》譴責許智峯涉搶手機事件而成立嘅調查委員會,身為委員會副主席嘅自由黨張宇人遲到咗三分鐘,造就流會局面。
僅兩委員在席
話說委員會原定噚日朝早8點半開會,但因人數不足而流會,由於內容屬機密,委員會主席麥美娟話不便透露邊啲議員缺席而導致流會。佢堅稱有關會議「其實冇乜嘢」,只係處理一啲行政同手續問題,下次開會再跟進已可,所以流咗會都冇乜嘢。佢之後會同委員「夾時間」,或要本月尾或下月初才再召開會議。
呢個委員會有七名委員,除咗主席麥美娟,副主席為謝偉俊,委員包括張宇人、梁繼昌、郭榮鏗、張國鈞及謝偉銓。根據會議規定,委員會連同主席在內需要五人先可開會,據知部份委員早已請假,最終只有麥美娟同謝偉銓在席。張宇人向八方證實8點48分先趕返會議廳,即係距離點人數鐘結束後三分鐘,結果會議欠一名法定人數而收檔。