熱爆全城的「安心偷食」事件，好多網民甚至大機構都玩改圖贈興兼抽水，估唔到立法會噚日辯論預算案，有議員都抽「安心偷食」嘅水，借呢單嘢去寸財爺陳茂波份財政預算案好失敗。
何啟明讚馬明真男人
好似公民黨黨魁楊岳橋（AY）噚日發言，就用許志安道歉嘅金句寸波波，話一個人做錯事，可以話自己係一個壞咗嘅人；不過特區政府嘅理財方向錯咗咁多年，佢就懇請唔知壞咗未嘅官員，同埋唔知壞咗未嘅政府，拋掉蕭規曹隨、新瓶舊酒嘅財政預算方案，真真正正引入理財新哲學，唔好令已失治嘅香港變壞咗嘅香港。
除咗楊岳橋，工聯會何啟明發言一樣提「安心偷食」。佢先嘲諷預算案係「雞肋」，再加埋近排發生「安心偷食」，市民更加唔理份預算案，佢又話馬國明事後回應顯示有「真男人」特質，即使自己受傷害仲會維護身邊嘅女士，話呢種氣量唔係個個人學得到，但波波作為男司長，預算案對婦女、弱小保障不足，不過何啟明即時補飛，話佢唔敢話波波唔係真男人，只係波波為預算案做諮詢不斷呼籲大眾「交波」，但工聯會提好多意見，波波都又冇接波，所以先咁講。
李八方