講開李永達判刑，八方梗係關心佢有冇心理準備，會唔會立即申請保釋，高達話佢心理狀態唔錯，坐幾個月到一年半載應該完全冇問題。但最令八方意外係，原來佢傾向唔保釋，如果刑期係幾個月到半年，佢情願即刻入去坐，即使刑期長，佢都想先喺監入面坐一陣，之後先再諗係咪保釋等上訴。
黃浩銘教路 避免難適應
高達同八方講，原來佢為保釋問題請教過社民連黃浩銘，阿銘同佢講，如果刑期唔長，不如直接坐晒仲好，阿銘以佢嘅經驗話，如果坐一陣又保釋，剛適應監獄規限又走返出去自由世界，但打完上訴要再坐，又要重新適應監獄生活，咁樣轉嚟轉去好辛苦好難適應，不如一坐到尾反而仲好，高達聽完阿銘咁講又覺得啱，所以除非判好重，否則不如坐晒刑期，唔想保釋出嚟等上訴。