隔牆有耳:入冊前還書債 李永達送回憶 - 李八方

隔牆有耳:入冊前還書債 李永達送回憶 - 李八方

佔中九子案下星期判刑期,九子喺呢段自由嘅時間各有各忙,其中民主黨李永達呢排趕喺判刑前周圍「找數」,全因佢欠落一身「債」,一定要喺坐監前搞掂呢條數,仲已經同老友單仲偕、張文光交代定「後事」,萬一佢入監前搞唔掂,就由佢兩個幫手搞埋啲尾數。八方好奇問高達有爭人錢咩?高達話唔係爭人錢,係欠好多人佢本回憶錄嘅書債,喺家仲要唔多夠書還債㖭!

暫不加印 節錄網上公開

原來高達本回憶錄印咗1,000本,佢諗住一部份拎嚟賣,幫守護公義基金籌款,其他就送畀一班相識多年嘅各方好友,點知佢一話賣書,以前嘅大學同學及不同圈子朋友就十本八本咁同佢買,搞到有樓上書店想問佢拎書賣都冇得畀人。至於送書方面,佢送送吓先發現唔夠書送,所以趁呢幾日仲有時間,佢就去民主黨、教協有寄賣佢本回憶錄嘅地方,收返部份未賣嘅書用嚟送畀人。

高達話原本有好多老朋友想親自送書畀佢哋,好似飛哥、田少、周梁咁,但因為判刑前真係太忙,真係冇時間送書,高達講唔好意思之餘,仲向單仲偕、張文光交代定「後事」,叫佢哋兩個喺自己坐監之後幫手送書還書債。由於高達暫時唔諗住加印回憶錄,好多市民又話買唔到佢本書,所以佢已同網媒眾新聞傾好咗,會將本書入面最多人講、最精采嘅三部份,包括談及已故支聯會主席司徒華、中共地下黨及民主派滲透等放上網,等買唔到書嘅市民可以睇到。

李八方