趣趣地：卡城獵海鷗重燃護級希望

卡迪夫城星期二喺英超獨腳戲作客以2:0輕取白禮頓，搶得護級重要三分。排喺聯賽榜尾3嘅卡迪夫城賽前喺英超7戰輸足6場，護級不容再失。星期二喺客場出戰白禮頓，卡城信心十足，開波22分鐘就由文迪斯拿恩治喺禁區外射入領先1:0。上星期六喺主場以0:5大敗予般尼茅夫嘅白禮頓，換邊後5分鐘再失一球，桑摩利臣接應甘馬拉沙開出嘅罰球頂入，幫卡迪夫城以2:0贏波，重燃護級希望，白禮頓就錄得英超4連敗同埋各項賽事5連敗。取得寶貴三分嘅卡迪夫城，家陣以34戰得31分續居第18位，雖然仲未脫離降班區，但同少踢1場排第17位嘅白禮頓只有2分差距，落後33戰得36分嘅修咸頓5分。排第19、20位嘅富咸同哈特斯菲爾德就已篤定要降班。