【黑鏡線索】
《蘋果日報》推訂閱制，係高難度動作，但係值得博一鋪。
坊間有唔同評論，但至少都同意一點，而家嘅模式，唔可以長久。呢個唔單止係香港報業問題，亦唔單止係全世界報業嘅問題，而係所有做內容跑流量賺廣告為生嘅公司都面對嘅問題。流量行業零門檻，競爭無錢，內容供應商走向原子化，廣告利錢喺食物鏈裏面集中晒喺兩大中間人平台Google同facebook手上。唔變，即係坐以待斃。
facebook限制 加速變法
facebook上年開始收水，唔派咁多流量畀非業餘內容供應商，唔少人認為係當前問題嘅觸發點。但我懷疑，就算冇facebook手上呢個改變，件事本身都唔係可以長久，個改變只不過係加速咗事態演變。呢個角度睇，可以話係好事，令大家更冇包袱，更狠下心腸去試本來就應該試嘅路，如果仲生存緊的話。
訂閱制係比較多人試嘅路，報紙方面有《New York Times》，《Washington Post》，香港嘅《信報》等等。其他媒體有Netflix、Spotify，最新宣佈嘅Apple TV+同Disney+等等，香港一早有有線同Now等等都係做月費。月費個business model本身係有佢嘅吸引力，但一個媒體由純靠流量廣告，轉型做月費訂閱，絕對唔係加個功能咁簡單。
修正問題易 踏出第一步難
當然，加道paywall都唔係咁簡單，中間可以有好多考慮，例如牆外全部冇得睇，定係有幾篇quota，例如點樣處理Google SEO搜唔搜到網站內容等等。關於呢啲技術問題，有唔少專家已經第一時間跳出嚟分析，唔少分析得詳盡有理，但如果結論係《蘋果》做得好失敗，我認為係見樹不見林。整網站，唔係起隧道，修正成本好低，枝末嘅嘢，要改唔難，最難係踏出第一步。
講返訂閱，而家係免費，將來會有收錢plan，但唔知有冇免費plan。同係訂閱，收錢同免費，係兩個完全唔同嘅操作。免費訂閱，即係唔係直接問用戶收錢，咁唔收錢搞訂閱做乜？一個方向，係儲用戶個人數據，冇訂閱都勉強做到數據，不過有就容易同準確得多，用數據變錢。賣數據係一種方法，但仲有好多其他冇咁直線嘅變錢方法。行呢條路，數據越多越好，咁做內容時可能仍然好着緊流量。而更大嘅挑戰係搵到有效方法由數據變利潤嘅模式。
月費內容 流量次要
但如果行收費，流量就唔係咁重要，最緊要越多人肯繼續畀錢越好。所以免費電視台開口埋口講收視，Netflix就從來唔公開收視，只公開上客速度。行呢條路，就係要做啲內容，吸引到人不單止肯畀錢睇某一個內容，而係肯決志去以後每月都畀錢睇（當然可中途取消）。「安心上路」可以令幾十萬人免費訂閱，但可以游說幾多人月費訂閱？即係話，做月費內容同做流量內容，可以係完全兩種唔同操作。如果真係要轉，呢個將會係一個非常深層次嘅轉變。
無論邊條路，都係高難度動作，但係值得博一鋪。
撰文：宋漢生