前行政長官、政協副主席梁振英狙擊《蘋果》廣告，點知今次狙擊竟然狙擊返佢自己！仲俾網民恥笑佢俾自己粉絲鬧返佢「廢」、係「暴徒」，點解689今次咁失策？
74年測量學高級文憑畢業
話說689噚日又喺fb發文，指「今（昨）日《蘋果》只有一版全版廣告」，客戶係理工大學專上學院，咁佢班粉絲梗係跟住鬧理大，有人留言「理大專收黃屍？」、「垃圾學生才會去讀」、「廢大即是廢大，專產暴徒」等等，不過佢班粉絲冇為意，689其實都係理大出身，佢1974年喺理大前身、理工學院測量學高級文憑畢業，1997年仲獲校方表揚為「傑出理大校友」，有網民即時轉貼加附和689班粉絲，話佢哋真係鬧得啱，話理大真係出過好出名嘅「暴徒」，又有人話垃圾學生先讀理大，唔知又包唔包作為「傑出理大校友」嘅689呢？
其實有689粉絲都知瀨嘢，喺留言度補飛，話689係以前理大學生，又話689讀理大年代，學生有水平高素質，所以689做特首受香港特區市民擁護喎，雖然叫做可以幫689兜到，但就兜得好夾硬，而且689班粉絲留言鬧理大前，為乜冇諗到會燒埋689呢？似乎都要檢討吓喎。
李八方