好多人都知，北京唔少領導人、官員仔女，唔係去咗外國就係嚟香港做嘢定居，不過佢哋有個共通點，就係低調，而且越高級領導仔女就越低調，可能怕俾香港傳媒追訪，而習近平親信，中央政治局常委、人大委員長栗戰書女兒栗潛心一直喺香港嘅建銀國際做嘢，而佢亦好低調，好少出席公開活動，不過中聯辦出稿，話栗潛心出席國家安全教育展開幕式，仲登埋栗潛心嘅相。
據香港中聯辦網站消息話，栗潛心以建銀國際副董事長身份，出席香港政策研究所「香港願景計劃」主辦的國家安全教育展開幕式，同場仲有特首林鄭月娥、國務院港澳辦副主任鄧中華、外交部駐港特派員公署特派員謝鋒等主禮，之後仲有大合照，由於相中冇標明邊個係栗潛心，而主禮只有娥特及栗兩名女士，照片中除咗娥特外，最左邊仲有位女士，唔知佢係咪栗潛心呢？